Published on March 6, 2010
in 2010.
Nhar il-Ħamis 4 ta’ Marzu 2008 filgħaxija il-Moviment Comunione e Liberazione ċċelebra it-28 sena mit-twaqqif tiegħu u l-ħames snin mill-mewt tal-fundatur Don Luigi Giussani, b’quddiesa mmexxija mill-ET Mons Isqof Mario Grech fil-knisja ta’ San Ġakbu, il-Belt. Fl-omelija, l-Isqof qal:
Is-soċjetà tista tiġġieled il-faqar materjali, intellettwali, etiku u spiritwali li hawn fostna billi tinvesti aktar fl-edukazzjoni. L-edukazzjoni tinkludi mhux biss it-tagħlim fl-iskejjel, imma l-formazzjoni tal-persuna sħiħa. Il-fatt li llum aktar studenti qed jiksbu tagħlim akkademiku mhux biżżejjed għax, kif għidna fl-Ittra Pastorali ta’ dan ir-Randan, għalkemm ħafna saru jafu jaqraw, m’humiex kapaċi jaqraw l-istorja tagħhom u tal-ġens tagħhom; għalkemm ħafna jafu jgħoddu s-somom, imbagħad ma jafux jagħmlu s-somom ta’ ħajjithom. Sistema edukattiva tajba, speċjalment f’dan iż-żmien ta’ relattiviżmu, iserraħ fuq x’kunċett għandna tal-bniedem!
Continue reading >>
Published on February 23, 2010
in 2010.
Reliġjożità awtentika
Xi darba ġie li nistaqsi għaliex Alla huwa daqshekk sieket u mbiegħed minna meta aħna poplu daqshekk reliġjuż u għandna daqshekk pjetà! Huwa ftit stramb kif minkejja li aħna nies tal-Knisja, akkaniti għall-festi, nieħdu għalina jekk xi ħadd ifettillu jmiss xi statwa, niftaħru li għandna traduzzjonijiet reliġjużi, imbagħad nitolbu u ma naqegħlux, insejħulu u ma jagħtix widen, tant li hemm min jibda jaħseb li Alla raqad!
Continue reading >>
Published on February 18, 2010
in 2010.
Għall-Insara r-Randan huwa żmien ta’ 40 ġurnata li matulhom inħejju lilna nfusna biex niltaqgħu ma’ Kristu fil-misteru tal-Għid – Kristu li bata, miet u qam rebbieħ. Dwar Kristu, San Pawl jgħid li “dak li ma kienx jaf x’inhu dnub, Alla għamlu dnub għalina sabiex aħna nsiru fih ġustizzja ta’ Alla” (2Kor 5,21). X’inhi din il-ġustizzja li Alla jagħti permezz tal-fidi fi Kristu (cfr. Rum 3,22)?
Skont id-definizzjoni klassika, il-ġustizzja hija li kull wieħed jirċievi dak li hu tiegħu. Imma ħafna drabi dan is-sens ta’ ġustizzja napplikawh biss f’dak li għandu x’jaqsam mal-ġid materjali. Dan huwa biss diskors limitat dwar il-vera ġustizzja. Huwa fatt li ħafna drabi d-dinja sa dan il-livell ta’ ġustizzja tasal – jekk tasal! Dwar dan is-suġġett nirreferi għall-Ittra Pastorali li ktibt fl-okkażjoni tal-festa ta’ Santa Marija tas-sena 2009.
Continue reading >>
Published on February 11, 2010
in 2010.
Festa nazzjonali
Il-festa tan-nawfraġju ta’ Missierna San Pawl m’hix biss festa reliġjuża tagħna l-Insara, imma għalina l-Maltin u l-Għawdxin hija festa tan-Nazzjon, hija festa li timmarka l-kalendarju nazzjonali tagħna għaliex in-nawfraġju ta’ Pawlu huwa parti mill-istorja ta’ ġensna.
Jekk ikollna nitfgħu ħarsa ħafifa fuq din l-istorja ta’ ġensna naraw illi seħħew diversi “passaġġi” li llum niftaħru bihom. Hekk, per eżempju, il-passaġġi li għamilna fl-Indipendenza, f’Jum il-Ħelsien ta’ pajjiżna, meta sirna Repubblika u meta dħalna fl-Ewropa. Dawn kollha huma passaġġi li ħallew marka fin-nisġa ta’ pajjiżna. Imma illejla nixtieq ngħinkom tirriflettu dwar passaġġ storiku ieħor illi wkoll iddetermina l-istorja ta’ pajjiżna.
Continue reading >>
Published on January 27, 2010
in 2010.
Fl-okkażjoni tal-festa ta’ San Franġisk de Sales, patrun tal-ġurnalisti, nhar il-Ħamis 21 ta’ Jannar 2010, l-Isqof Mario Grech qaddes għall-ġurnalisti fil-knisja tas-Sorijiet Franġiskani, Victoria, u fl-omelija wassal dan il-messaġġ:
“F’kuntest soċjali bħal tagħna, fejn tinħass l-urġenza li tinfirex ħidma edukattiva tal-bniedem sħiħ, il-midja għandha sehem importanti għax hija strument li jista’ jagħmel ħafna ġid f’din l-emerġenza edukattiva.
Meta l-ġurnalisti jħaddmu l-midja b’mod responsabbli, għandna nkunu ħafna grati lejhom għax bil-kelma mitkellma jew miktuba effettivament huma jinfluwenzaw ħafna fit-tiswir tal-individwu, tas-soċjetà u tal-kultura. Daqskemm il-midja tista’ tgħin fit-tajjeb, daqshekk ieħor tista’ tagħmel ħsara, speċjalment illum meta aħna m’aħniex edukati biex naqraw jew naraw b’mod kritiku.
Continue reading >>
Published on January 27, 2010
in 2010.
Nhar il-Ġimgħa, 22 ta’ Jannar, l-Isqof t’Għawdex Mons Mario Grech mexxa quddiesa pontifikali flimkien ma’ għadd sabiħ ta’ saċerdoti fil-Knisja tar-Ragħaj it-Tajjeb fl-okkażjoni tar- raba’ anniversarju tal-konsagrazzjoni tiegħu bħala isqof ta’ Għawdex. F’din l-okkażjoni l-Isqof għamel din l-omelija:
Iltqajna flimkien għal din l-Ewkaristija biex irroddu ħajr lil Alla li fit-tjubija tiegħu erba’ snin ilu assigura s-suċċessjoni apostolika lil din il-Knisja lokali bil-konsagrazzjoni ta’ isqof ġdid! Magħkom jien ukoll irrid ngħid grazzi lil Alla talli minkejja l-limiti tiegħi afdali t-tmexxija ta’ din id-djoċesi.
Ir-raba’ anniversarju tal-konsagrazzjoni episkopali tiegħi jagħtina l-okkażjoni biex nagħmlu riflessjoni dwar il-ministeru tal-isqof. Naturalment, l-ewwel u qabel kollox jien nagħmel din ir-riflessjoni għalija nnifsi biex inkun nista’ ngħix bil-fedeltà s-sejħa li għamilli Alla; imma importanti wkoll li din ir-riflessjoni nagħmluha flimkien għaliex il- ministeri jingħataw in vista ta’ komunità u jitħaddmu fi ħdan il-komunità; għalhekk, anke l-komunità Nisranija għandha sehem importanti biex kull ministeru, inkluż il-ministeru ta’ isqof, jagħti l-frott.
Continue reading >>
Published on January 8, 2010
in 2010 and 2010.
Waqt pontifikal fl-Ewwel tas-Sena li sar fil-Katidral, l-Isqof t’Għawdex għamel appell għal aktar impenn fl-edukazzjoni tal-bniedem. Huwa qal:
L-għerq tal-għejja u l-qtiegħ il-qalb li għaddejja minnhom iċ-ċiviltà ta’ żminijietna huwa l-kriżi fl-edukazzjoni jew il-formazzjoni tal-persuna.
Għalkemm id-defiċit finanzarju qanqal ħafna tħassib u interventi korretorji, l-agħar defiċit li għandha s-soċjetà moderna huwa dak tal-valuri umani, partikularment l-isfiduċja fil-futur!
F’dan il-kuntest inħoss li ż-żmien ta’ llum qed jgħabbi lis-soċjetà u lill-Knisja bir-responsabiltà biex jinvestu aktar fl-edukazzjoni tal-bniedem.
L-edukazzjoni, li huwa kunċett aktar wiesa’ minn edukazzjoni skolastika, tgħin lill-bniedem ikun aktar ħieles, aktar u aktar meta llum għandna kunċett żbaljat ta’ libertà.
F’epoka meta l-bniedem qed jagħmel qasma bejn ir-raġuni u l-istinti emottivi, bil-konsegwenza li għandna stili ta’ ħajja affettiva ambigwi u konfużjoni f’dak li għandu x’jaqsam mal-esperimenti li jsiru dwar il-ħajja, hija meħtieġa azzjoni urġenti biex il-bniedem jeduka moħħu u qalbu.
Continue reading >>
Published on January 6, 2010
in 2010 and 2010.
F’quddiesa pontifikali li l-Isqof Mario Grech mexxa nhar il-Ħadd filgħodu, 3 ta’ Jannar, fil-Bażilika ta’ San Ġorġ fl-okkażjoni tal-festa tal-Epifanija, huwa wassal dan il-messaġġ:
Skont it-tradizzjoni, il-maġi li marru jaduraw lil Ġesù tarbija kienu għorrief u slaten. F’Betlehem huma kellhom laqgħa kemm ma’ Kristu kif ukoll mal-ewwel komunità Nisranija preżenti fil-Familja Mqaddsa. X’messaġġ għandha l-komunità Nisranija llum lill-“maġi” ta’ żminijietna li qed jagħtu direzzjoni lill-ħajja tas-soċjetà? Dawn huma l-politiċi, il-leġiżlaturi u n-nies ta-kultura u tal-midja.
F’Novembru li għadda, grupp ta’ Kattoliċi, Anglikani, Ortodossi u Evanġeliċi permezz tad-Dikjarazzjoni ta’ Manhattan sejħu lil dawk li għandhom kuxjenza Nisranija biex jingħaqdu flimkien u jwasslu lill-“maġi” kontemporanji messaġġ dwar il-valur tal-ħajja, in-natura taż-żwieġ u l-libertà reliġjuża – tliet prinċipji fundamentali tal-ġustizzja u l-ġid komuni.
Filwaqt li jfakkru fid-dmir ta’ kull ċittadin li jobdi l-liġijiet ġusti, iddikjaraw li mhux lesti li joqogħdu għal liġijiet immorali. L-istituzzjonijiet ta’ dawn il-komunitajiet Insara jirrifjutaw li jagħmlu abort, riċerki li jeqirdu l-embrijun uman, assistenza lil min irid jagħmel ewtanasja u kull azzjoni kontra l-ħajja.
Huma jtennu wkoll li ma jridux imilu quddiem xi liġi li titlob minnhom li jbierku partnerships sesswali immorali; li b’xi mod jikkunsidraw dawn ir-relazzjonijiet daqslikieku huma żwiġijiet normali; u li ħadd ma jpoġġilhom sarima fuq fommhom biex ma jgħidux il-verità dwar il-moralità u l-immoralità taż-żwieġ u l-familja.
Continue reading >>
