Gozo Diocese

Omelija fil-Velja djoċesana ta’ Għid il-Ħamsin
Pjazza San Ġorġ, Victoria, Għawdex
Is-Sibt 26 ta’ Mejju 2007
L-E.T. Mons. Mario Grech, isqof ta’ Għawdex

FEWĠA ĦELWA

Fis-sekwenza li għadna kif tlabna, fost ħwejjeġ oħra aħna lill-Ispirtu s-Santu sejjaħnielu “fewġa ħelwa”. Nistqarr magħkom li din iċ-ċelebrazzjoni qed inħossha bħal fewġa ħelwa u nixtieq lil kull wieħed u waħda minnkom iġarrab dan l-istess sentiment. Nixtieq illi t-tifkira ta’ din l-esperjenza tagħna flimkien tkun fewġa ħelwa li takkumpanjana fit-toroq tal-ħajja fix-xhur li ġejjin.

Fewġa ħelwa
Fid-diversi siltiet li tħabbrulna mill-Kelma ta’ Alla llejla nara li hemm messaġġ pożittiv ħafna. Veru li l-ħajja tagħna llum xi drabi hija bħall-belt ta’ Babel (ara Ġen 11,1-9), fejn il-bniedem donnu jrid jibni l-belt tiegħu biex jilħaq is-sema u jeskludi lil Alla. Imma huwa veru wkoll dak li jgħid Eżekjel permezz ta’ tixbiha oħra: minkejja li l-ħajja qisha wied fejn hemm l-iskeletri u riħa ta’ mewt, Alla jwiegħed li jibgħat l-Ispirtu tiegħu – Spirtu li joħloq, iqaddes u jagħti l-ħajja (ara Eżek 37). Għalhekk f’din il-lejla nħossu l-Ispirtu s-Santu bħala fewġa ħelwa.

Mibgħutin
Fil-Vanġelu li tħabbrilna (Ġw 20,19-23) Ġesù lill-Appostli mhux biss jikkomunikalhom l-Ispirtu tiegħu, imma jgħidilhom: “Kif il-Missier bagħat lili hekk jien nibgħat lilkom”. Hekk ukoll għandna nħossuna mibgħuta aħna lkoll. Biex din il-fewġa ħelwa li jagħtina l-Ispirtu ta’ Alla nikkomunikawha lid-dinja ta’ madwarna u ’l-Knisja f’Għawdex hemm bżonn tkun “aħbar tajba”, kif iffissajna fil-Pjan Pastorali ta’ din is-sena!

Għalhekk illejla nitolbu lill-Ispirtu s-Santu biex lil kull wieħed u waħda minna – lili, isqof tagħkom; lilkom, ħuti fis-saċerdozju; lilkom, reliġjużi; u lilkom, lajċi – jagħtina li nħossuna mibgħuta biex inkunu aħbar tajba, biex innisslu t-tama, u hekk din il-fewġa ħelwa tgħaddi mill-bibien, mit-twieqi u jekk hemm bżonn mill-ventilaturi tad-djar tagħna, billi din hija aħbar li għandha bżonn il-familja tagħna.

Kapulavur ta’ l-Ispirtu
Illejla, meta proprju qegħdin nagħmlu din it-talba ta’ tifħir lill-Ispirtu s-Santu, ma nistgħux ma nitfgħux ħarsitna fuq il-beatu Ġorġ Preca, li fil-fehma tiegħi huwa kapulavur ta’ l-Ispirtu s-Santu. Illejla nixtieq nippreżentahulkom bħala bniedem illi tassew għamel esperjenza ta’ l-Ispirtu bħala fewġa ħelwa u ħassu milqut minn Kristu biex din l-Aħbar it-Tajba jxandarha ma’ kulħadd. Il-Knisja sa tippreżenta lil Dun Ġorġ mhux biss lilna l-Maltin u l-Għawdxin imma lill-ġemgħa universali bħala wieħed mill-mudelli ta’ dawk illi ħallew l-Ispirtu jnebbaħhom biex ikunu Bxara Tajba. Jien naħseb li hawn numru sustanzjali minna, anki hawn preżenti, li gawdew, jekk mhux ukoll qegħdin igawdu, mill-ħeġġa li kellu Dun Ġorġ għal Kristu u li mbagħad għaddieha lis-Soċjetà tiegħu.

X’nixtieq nissottolinja fuq Dun Ġorġ f’dan il-kuntest kollu? Għax kien mimli bl-Ispirtu, Dun Ġorġ għaraf x’kienu l-ħtiġijiet ta’ żmienu u sab forma ġdida kif iwassal il-Bxara t-Tajba. Għalhekk ħoloq l-“oqsma”, li huma skejjel tal-katekiżmu. Huwa għaraf x’kontenut kellu jwassal bit-tagħlim; għaliex ħafna drabi jista’ jkollok ċentri u oqsma, imma wieħed jistaqsi x’qegħdin nittrażmettu! Dun Ġorġ kien dejjem jittrażmetti “Leħen il-Maħbub”, il-leħen ta’ Sidna Ġesù Kristu. Barra minn hekk Dun Ġorġ ma kienx kuntent li hu jkun appostlu waħdu, imma ħaseb biex iħarreġ lis-soċji tiegħu bħala “appostli” oħra biex ikunu jistgħu jwettqu din il-missjoni u jħossuhom mibgħuta mill-Mulej. Dun Ġorġ nissel fis-soċji tiegħu dak li llum insejħulu spirtu ta’ volontarjat b’indirizz speċifiku: volontarjat f’qasam ekkleżjali, b’għan preċiż li huwa dak tal-katekeżi. Huwa mhux biss nissel fihom ix-xewqa li jingħataw b’mod volontarju imma wkoll għaddielhom l-ispirtu tiegħu biex ikunu ddedikati u determinati.

Rifless fid-djoċesi
Dan kollu jiena nixtiequ jseħħ fil-Knisja tagħna; fina lkoll, imma f’xi wħud minna aktar minn oħrajn, għaliex dan jagħmel parti mill-identità tagħna li aħna mibgħuta b’sejħa minn Alla fil-Knisja: “Kif il-Missier bagħat lili hekk jien nibgħat lilkom”. Għeżież tiegħi, xi drabi nħoss li aħna mhux dejjem inħossuna mibgħuta biex proprju nwasslu l-leħen tal-Maħbub. U biex inkunu nafu l-leħen tal-Mulej irridu nkunu midħla tal-Kelma, ħalli mbagħad insibu postna f’dawk l-iskejjel tal-katekeżi li jinkludu mhux biss l-oqsma tal-Museum imma wkoll id-diversi ċentri tal-katekeżi u ċentri li jilqgħu lit-tfal, l-adolexxenti kif ukoll l-adulti, l-għarajjes u l-familji tagħna. Kemm tkun ħaġa sabiħa illi minn dawn iċ-ċentri u minn dawn l-iskejjel tal-katekeżi toħroġ fewġa ħelwa li tpaxxi lir-ruħ!

Skola għall-ministeri
Biex nagħmlu dan għandna bżonn ukoll ninvestu aħjar. B’dan infisser li forsi hemm bżonn inbiddlu ċerti skemi li għandna biex ninvestu aħjar ħalli jkollna skola li fiha jitħarrġu l-appostli. Bħalma għandna s-seminarju li fih jitħarrġu u huma mħejjija s-saċerdoti, għax m’għandux ikollna wkoll skola li fiha jitħarrġu l-lajċi u r-reliġjużi ħalli jkunu tajbin biex iwasslu l-Bxara t-Tajba? Il-ħsieb tagħna huwa li fil-futur fid-djoċesi jkollna din l-“iskola għall-ministeri”. Il-Knisja għandha bżonn ta’ iktar voluntiera veri. Hawn irrid infisser l-apprezzament tiegħi lejn dawk kollha li b’mod jew ieħor, volontarjament u mingħajr interess, jekk mhux ukoll bi spejjeż tagħhom u sagrifiċċju, qegħdin jingħataw għal din il-missjoni. Imma għandna bżonn ta’ iktar voluntiera ħalli l-biċċa xogħol li bdejna nkunu nistgħu ntemmuha.

Dan huwa li jien nitlob illejla lill-Ispirtu s-Santu Alla bl-interċessjoni ta’ Dun Ġorġ: biex ikattar fina lkoll din l-esperjenza ta’ l-Ispirtu li hija esperjenza li sserraħna u timliena bil-paċi, imma wkoll timliena b’dik il-passjoni għal Kristu ħalli nkunu nistgħu nxandruh minn fuq il-bjut tagħna.

ĦELSIEN VERU

Omelija ta’ Mons Isqof Mario Grech fl-okkażjoni ta’ l-ewwel dehra tal-Madonna ta’ Fatima u fil-ftuħ tal-“Kampanja favur ambjent moralment nadif” (Knisja ta’ Ħamet – 15 ta’ Mejju 2007).

Fl-Atti ta’ l-Appostli (16,22-34) naqraw li Pawlu u sħabu bil-qawwa tat-talb u l-kant ta’ l-innijiet lil Alla nħelsu mill-irbit tal-ktajjen u kienu ħielsa. Mhux hekk biss, imma dan kollu ġab stagħġib fl-għassies; x’ħin ra lil Pawlu u lil sħabu meħlusa minn kull irbit, huwa stess staqsa x’għandu jagħmel biex isalva, jew ahjar biex hu wkoll ikun “ħieles”.

Illum il-bniedem huwa mxekkel, għandu irbit li jista’ jkun ġej minn ktajjen ħoxnin u oħrajn inqas ħoxnin; ħafna drabi l-bniedem għandu piż ma’ riġlejh li jfixklu milli jimxi; kemm jekk jkun piż moderat u kemm jekk ikun tqil, il-mixi tiegħu ikunu imxekkel. Anzi, xi darba l-mażra tkun tant tqila li l-bniedem jistalla u ma jagħmel ebda pass!

Imma mbagħad il-bniedem li bħal Pawlu jemmen f’Alla u jiftaħ qalbu għaliH, jaf iġarrab il-qawwa ta’ Alla u jagħmel l-esperjenza tal-ħelsien! Jaf ikun hemm terremot f’ħajtu li jgħinu jinħeles minn dak kollu illi qiegħed jorbtu u jnaqqarlu il-libertà.

Meta llum qegħdin infakkru l-ewwel dehra tal-Madonna ġewwa Fatima, qegħdin ukoll inniedu kampanja favur ambjent moralment nadif fid-djoċesi. Nappellalkom biex fil-ġimgħat li ġejjin nirriflettu u nieħdu azzjoni dwar x’inhu meħtieġ biex tassew ikollna ambjent moralment nadif. Għaldaqstant f’din iċ-ċirkustanza, xieraq nirriflettu dwar x’tip ta’ rbit jew xkiel immorali hemm fil-ħajja tagħna u li aħna għandna neħilsu minnu.

Iż-żmien tas-Sajf qed joqrob. Irridu nagħtu każ ta’ ċerta immoralità li teżisti f’dak li huwa atteġġjamenti, ilbies u kliem. Meta nhar il-Ħadd kont mal-komunità parrokkjali ta’ San Ġorġ, fid-dawl tal-qari meħud mill-Atti ta’ l-Appostli (15,28) appellajt biex kemm jista’ jkun inżommu s-santwarju tal-qalb tal-bniedem nadif, partikularment miż-żìna. Din ix-xorta ta’ immoralità qegħda taqbad f’pajjiżna, fil-kbar u fiż-żgħar. Il-Papa Benedettu XVI fiż-żjara li qiegħed jagħmel fil-Brażil ukoll appella ħalli l-insara jaħarbu ż-żìna u jikkomettu lilhom nfushom sabiex jissieħbu f’kampanja ħalli jkollna ambjent li tassew jirrispetta l-ġisem tal-bniedem u li aħna nuru li nemmnu tassew li l-ġisem tagħna huwa tempju ta’ l-Ispirtu s-Santu. Il-ġisem huwa nobbli u għandna nkunu attenti biex ma nċedux għal dak kollu li jtappan din id-dinjità u din is-sagralità tiegħu. Huwa fatt li din it-tip ta’ immoralità tiġġenera problemi oħrajn. U min għandu widnejn biex jisma, ħa jisma.

Forsi tistaqsuni: kif ser immorru kontra l-kurrent tad-dinja u kif ser niksbu dan il-ħelsien? Dan nagħmluh bil-qawwa tat-talb. Wieħed jawgura li l-imġiba u l-istess reżistenza tagħna għal ċertu stil ta’ ħajja jqanqal fl-oħrajn domanda simili għal dik li għamel l-għassies meta osserva l-ħelsien li ġarrbu Pawlu u sħabu: “Għiduli x’għandi nagħmel biex jien ukoll nikseb dan il-ħelsien tal-qalb u nkun kapaċi ngħix ċerti valuri fil-ħajja tiegħi ta’ kuljum”.

Ġewwa Fatima l-Madonna dehret diversi drabi imma l-messaġġ tagħha huwa wieħed biex nikkonvertu, biex jirnexxilna negħlbu d-dnub u hekk naraw dak li huwa sabiħ. Il-gmiel li kienet tirrifletti Marija f’ilbiesha u fil-persuna tagħha, li ġibed l-attenzjoni tat-tliet rgħajja ċkejknin, huwa ġmiel li jista’ jirrifletti fil-ħajja tagħna jekk aħna fil-ħajja interjuri u anke esterjuri ngħixu dawk il-valuri li tgħallimna r-reliġjon kattolika, u jekk aħna jirnexxilna ngħixu l-vera ħajja morali kif iridna l-Imgħallem Ġesù.

Imma l-gwaj huwa dak li jgħid il-Vanġelu: li tlifna s-sens tad-dnub! Jeħtieġ li aħna niskopru l-kruha tad-dnub; li kull wieħed u waġda minnha nimpenjaw lilna nfusna biex xejn fil-ħajja tagħna ma jwassalna biex nitilfu l-ħajja tal-grazzja. Dan jikkawża fina d-dnub: itellifna l-ħbiberija tagħna ma’ Alla. U meta nitilfu din il-ħbiberija u jkunx hemm din il-grazzja, fejn m’hemmx il-preżenza ta’ Alla fil-bniedem nitilfu wkoll dak il-ġmiel li kien rifless f’Marija.

Għalhekk, filwaqt li nkomplu din il-ħajja li hija sejħa għal konverżjoni kontinwa, filwaqt li nimmiraw biex fil-ħajja tagħna ta’ kuljum nilħqu ċerti valuri u ngħixu l-virtujiet insara, nagħmlu wkoll ħilitna biex bi kliemna u għemilna nikkontribwixxu biex ikollna ambjent moralment nadif.

Il-Verġni mbierka ta’ Fatima tieqaf magħna.