“Jekk tistaqsuni x’inhi l-ikbar xewqa tiegħi għall-Knisja tagħna f’dan il-Ġublew tal-Ħniena, ngħidilkom li hi li jkollna poplu li kapaċi jaħfer”. Hekk esprima ruħu l-Isqof ta’ Għawdex Mario Grech fl-omelija li għamel ilbieraħ filgħaxija fl-okkażjoni tal-ftuħ tas-Sena Mqaddsa fid-Djoċesi ta’ Għawdex.L-Isqof kien qed isemmi l-opri tal-ħniena li jmissu l-ġisem u r-ruħ, huwa u jirrifletti fuq il-Liturġija tal-Kelma tat-Tielet Ħadd tal-Avvent fejn Alla permezz tal-profeta jaħlef li ma jħallix idejn il-poplu tiegħu jintelqu.
Monsinjur Grech għamel ukoll stedina lill-kappillani Għawdxin biex matul dan il-Ġublew jagħżlu ġabra waħda f’xahar u jagħmluha għall-karità, anki jekk dan jaf ifisser uġigħ ta’ ras kif ħa jifdu spejjeż oħra li soltu tkopri dik il-ġabra.
L-ewwel Bieb tal-Ħniena miftuħ ilbieraħ fid-Djoċesi ta’ Għawdex kien dak tal-Katidral tal-Assunta fil-Belt Victoria. Ir-rit suġġestiv tal-ftuħ tal-Bieb Imqaddes beda quddiem il-kunvent tas-Sorijiet Karmelitani fit-Telgħa tal-Belt, fejn inqara l-Vanġelu tar-Ragħaj it-Tajjeb u xxandret ukoll silta mill-Bulla Misericordiæ vultus tal-Papa Franġisku.
Waqt li tkantaw salmi penitenzjali, il-poplu tela’ f’purċissjoni wara l-Isqof lejn il-pjazza tal-Katidral, fejn f’mument solenni ta’ skiet profond, għad-dell tal-faċċata imponenti tal-Gafà mixgħula jumejn ilu b’dawl ġdid, huwa fetaħ il-Bieb ewlieni u waqaf fih għarkupptejh jitlob.
Wara li għadda l-Isqof, imbagħad il-poplu kollu daħal biex kompliet iċ-ċelebrazzjoni tal-Quddiesa. Minkejja li x-xogħlijiet fiċ-Ċittadella għadhom mhumiex lesti, it-trabijiet ma żammewx lura lill-Insara f’Għawdex milli jinġabru fil-Katidral għal din il-liturġija sabiħa.
“Ftaħna l-Bieb tal-ħniena fuq il-ġens tagħna. Ejjew nitolbu kif kienu jħobbu jagħmlu missirijietna biex ir-Repubblika tagħna jkollha ‘soċjetà ħanina’, eżorta l-Isqof, b’riferenza wkoll għall-Innu Malti, kantat mill-kongregazzjoni fl-okkażjoni ta’ Jum ir-Repubblika, fejn Dun Karm jitlob: “Rodd il-ħniena lis-sid”.
L-Isqof sellem ukoll lill-komunità Anglikana li ssieħbet f’din iċ-ċelebrazzjoni. Hu rrimarka li qalbu tuġgħu jara li “għadna m’aħniex f’komunjoni sħiħa ma’ din il-Knisja oħtna”, u stieden lil kulħadd jitlob biex f’din is-Sena, fost il-bibien li jinfetħu, jinfetaħ ukoll dak tal-ekumeniżmu.
Segwi l-quddiesa minn hawn: gublew-koncelebrazzjoni.mp3
Ritratti: Ħajr lil John Cordina
