Ilbieraħ il-Ħadd 13 ta’ Diċembru, f’ċelebrazzjoni li bdiet fil-5.30pm, l-Isqof ta’ Għawdex Mons. Mario Grech fetaħ il-Ġublew tal-Ħniena fid-Djoċesi ta’ Għawdex. Ir-Rit tal-Ftuħ tal-Bieb Qaddis tal-Ħniena beda fit-Telgħa tal-Belt, fejn wara t-tħabbira tal-Vanġelu u l-qari mill-Bolla Misericordiae vultus, l-Isqof mexxa Purċissjoni lejn il-Pjazza tal-Katidral tal-Assunta u hemm infetaħ il-Bieb Imqaddes.
Fil-Quddiesa li segwiet, l-Isqof għamel omelija dwar il-ħniena ta’ Alla li sintesi tagħha tinsab mehmuża hawn.
Lejn l-aħħar tal-Quddiesa l-Isqof Grech irringrazzja wkoll lir-rappreżentanza tal-Komunità Anglikana f’Għawdex li ħadet sehem fiċ-ċelebrazzjoni u esprima x-xewqa tiegħu u tal-Knisja li f’dan is-Sena Mqaddsa “jinfetaħ ukoll il-bieb tal-ekumeniżmu”. F’Jum ir-Repubblika, hu awgura wkoll li Malta jkollha “soċjetà ħanina” kif dejjem kienu jitolbu missirijietna.
Għall-okkażjoni ġiet esposta wkoll għall-ewwel darba l-Ikona tal-Wiċċ tal-Ħniena, miktuba apposta għal din is-Sena Mqaddsa mis-saċerdot Għawdxi Dun Roberto Gauci.
Ir-ritratti huma ta’ John Cordina.
Ara l-vidjo minn hawn: https://vimeo.com/148853946