NIżżel il-Bullettin minn hawn:
Archive for November, 2014
“Il-familji huma l-ewwel seminarju”. Hekk qal Mons. Mario Grech, Isqof ta’ Għawdex, fil-Manifestazzjoni Djoċesana ta’ Kristu Re li nżammet aktar kmieni wara nofs in-nhar (il-Ħadd 23 ta’ Novembru 2014) quddiem is-Seminarju tal-Qalb ta’ Ġesù fil-Belt Victoria. Hu spjega li din is-sena ntgħażel is-Seminarju għal din iċ-ċelebrazzjoni billi t-tema magħżula, fl-okkażjoni wkoll tal-mija u ħamsin anniversarju mit-twaqqif tad-Djoċesi ta’ Għawdex, kienet dik tal-vokazzjonijiet.
L-Isqof sejjaħ is-Seminarju, miftuħ sentejn biss wara li twaqqfet id-Djoċesi fl-1864, bħala l-qalb tad-djoċesi, tal-poplu kollu ta’ Alla f’Għawdex. “Minn din id-dar”, qal l-Isqof, “ħarġu ’l fuq minn sitt mitt saċerdot. U għalhekk ġejna hawn biex napprezzaw dan id-don ta’ Knisja żagħżugħa mija u ħamsin sena u nkomplu nitolbu lil Kristu, Sultan u Ragħaj, biex ikompli jsejjaħ aktar qlub ġenerużi”. Hu indirizza b’mod speċjali l-adolexxenti u ż-żgħażagħ tagħna li, għalkemm fil-parti l-kbira tagħhom huma mrawma tajjeb fil-fidi, bħar-raġel għani tal-Vanġelu għandhom ħafna mistoqsijiet serji u profondi f’qalbhom li jistennew risposta.
It-tweġiba li tista’ tissodisfa dan in-nuqqas ta’ serħan, kompla l-Isqof, qiegħda fil-ħarsa ta’ mħabba ta’ Ġesù li naqraw dwarha fl-istess Vanġelu. U ż-żgħażagħ tagħna jistgħu jaslu biex iwieġbu għal sejħa saċerdotali, reliġjuża jew ta’ ħajja kkonsagrata, jekk fil-ġenituri u l-familji tagħhom isibu din il-ħarsa ħelwa. Għalhekk il-familji huma mixtla ta’ vokazzjonijiet. “Għeżież żgħażagħ, il-Knisja jinteressaha minnkom u tistmakom”. Il-proposta ta’ Ġesù hi li ż-żgħażagħ jiftħu qalbhom għall-foqra u jsiru strumenti ta’ komunjoni, għax dan jibni l-vokazzjoni. L-Isqof irringrazzja b’mod speċjali lill-animaturi vokazzjonali u pastorali fil-parroċċi li jgħinu lill-adolexxenti fit-tiftix tas-sejħa tagħhom. Hu semma kif baqa’ milqut minn kummenti ta’ membri żgħar tal-Grupp tal-Vokazzjonijiet fix-Xagħra, fejn qed jagħmel il-Viżta Pastorali bħalissa, li semmewlu numru sabiħ ta’ saċerdoti li jammiraw, fosthom għadd sabiħ ta’ anzjani.
Iċ-ċelebrazzjoni bdiet b’korteo bl-istatwa tar-Ragħaj it-Tajjeb minn Pjazza Santu Wistin, li fih ħadu sehem abbatini minn Għawdex kollu. “Min jaf meta tkunu qrib ta’ l-altar, x’jixtieq jgħidilkom Ġesù!”.
Sorpriża sabiħa għal dawk preżenti kienet l-intervent ta’ esperjenza vokazzjonali minn soru Ursolina u żewġ innijiet mill-istess sorijiet, li kantaw ukoll id-diska Love and let go li interpetaw fil-Eurovision Song Contest. L-Isqof irringrazzjahom tax-xhieda li taw fuq il-palk tal-kultura ta’ pajjiżna.
Fl-okkażjoni tas-Solennità liturġika ta’ Kristu Sultan tal-Ħolqien kollu, id-Djoċesi ta’ Għawdex tiċċelebra Jum il-Karità. Mal-bullettin jitqassam envolope biex jingħataw offerti b’risq il-ħidma ta’ karità u solidarjetà li twettaq id-Djoċesi permezz tal-Caritas Djoċesana. Il-ġbir fil-quddies tas-Sibt filgħaxija, 22 ta’ Novembru, u l-Ħadd 23 ta’ Novembru - Festa ta’ Kristu Re - imur ukoll għal dan il-għan.
Ikklikkja fuq l-istampa u ara t-tagħrif marbut mal-ħidma tal-Caritas għas-sena 2013.
“RELATIO SYNODI”
TAT-III ASSEMBLEA ĠENERALI STRAORDINARJA
TAS-SINODU TAL-ISQFIJIET
“L-ISFIDI PASTORALI DWAR IL-FAMILJA
FIL-KUNTEST TAL-EVANĠELIZZAZZJONI”
(5-19 TA’ OTTUBRU 2014)
Is-Sibt 18 ta’ Ottubru 2014
WERREJ
Introduzzjoni
L-EWWEL PARTI
Is-smigħ: il-kuntest u l-isfidi fuq il-familja
Il-kuntest soċjo-kulturali
Ir-relevanza tal-ħajja affettiva
L-isfida għall-pastorali
IT-TIENI PARTI
Il-ħarsa lejn Kristu: il-Vanġelu tal-familja
Il-ħarsa lejn Ġesù u l-pedagoġija divina fl-istorja tas-salvazzjoni
Il-familja fil-pjan salvifiku ta’ Alla
Il-familja fid-dokumenti tal-Knisja
L-indissolubbiltà taż-żwieġ u l-ferħ tal-ħajja flimkien
Il-verità u l-ġmiel tal-familja u ħniena lejn il-familji miġruħa u dgħajfa
IT-TIELET PARTI
Il-konfront: perspettivi pastorali
Inħabbru l-Vanġelu tal-familja llum, fid-diversi kuntesti
Ngħinu lill-koppji li qegħdin f’mixja ta’ tħejjija għaż-żwieġ
Insieħbu lill-koppji fl-ewwel snin tal-ħajja taż-żwieġ
Kura pastorali għal dawk li qed jgħixu fiż-żwieġ ċivili jew f’konvivenzi
Nikkuraw il-familji miġruħa (separati, divorzjati li ma reġgħux iżżewġu, divorzjati li reġgħu żżewġu, familji b’ġenitur wieħed)
L-attenzjoni pastorali lejn il-persuni b’orjentament omosesswali
It-trasmissjoni tal-ħajja u l-isfida tat-tnaqqis fir-rata tat-twelid
L-isfida tal-edukazzjoni u r-rwol tal-familja fl-evanġelizzazzjoni
Konklużjoni
___________________
Niżżel id-dokument pdf minn hawn: 2014-10-18-relatio-synodi.pdf