Kreżimandi, ġenituri u parrini joħonqu r-Rotunda tax-Xewkija għal Ċelebrazzjoni Djoċesana
L-adolexxenti kollha li fil-ġimgħat li ġejjin sa jkunu qed jirċievu s-Sagrament tal-Griżma tal-Isqof fil-ħmistax-il parroċċa tad-Djoċesi ta’ Għawdex, nhar l-Erbgħa filgħaxija, 30 ta’ April 2014, iltaqgħu fir-Rotunda tax-Xewkija għal ċelebrazzjoni djoċesana mmexxija mill-Isqof Mons. Mario Grech. Huma kienu akkumpanjati mill-ġenituri u l-parrini tagħhom.
F’riflessjoni ċkejkna li għamel waqt it-Talba tal-Għasar, l-Isqof Grech ġab l-eżempju tad-dilka taż-żagħżugħ David mill-Profeta Samwel biex fisser lit-tfal li, għalkemm għadhom żgħar u t-triq lejn il-maturità Nisranija għadha fil-bidu tagħha, Alla jixtieq isejħilhom għal missjoni speċjali. “Taqtgħu qatt qalbkom mill-imħabba ta’ Alla”, ħeġġeġ l-Isqof Grech, li għadu kemm wasal lura minn Pellegrinaġġ Djoċesan f’Ruma għall-kanonizzazzjoni ta’ Ġwanni XXIII u Ġwanni Pawlu II.
F’din l-okkażjoni, il-katekisti ppreżentaw ittri miktuba bl-idejn mit-tfal li fihom jitolbu lill-Isqof jamministralhom il-Griżma.
Ritratt: Francesco Pio Attard
