Fl-okkażjoni tas-Sena Pawlina, nhar il-Ħadd, 8 ta’ Frar 2009, jumejn qabel il-Festa tan-Nawfraġju ta’ San Pawl, f’seba’ knejjes tal-belt Valletta se ssir ċelebrazzjoni kateketika mnebbħa mill-Ittri ta’ San Pawl.
L-inizjattiva qed tissejjaħ Mixja Pawlina.
Mons. Pawl Cremona O.P., Arċisqof ta’ Malta u Mons. Arċisqof Emeritus Ġużeppi Mercieca se jippresiedu Liturġija ta’ Talb fil-Knisja ta’ San Pawl Nawfragu. Din il-Liturġija se ssir fi tliet ħinijiet: fl-4.30p.m., fil-5.15pm u fis-6.00pm
F’seba’ knejjes oħrajn se jkun hemm ċelebrazzjonijiet f’forom diversi mibnijin fuq suġġetti meħudin mill-Ittri ta’ San Pawl. Dawn jinkludu drama, mużika u mima, waqt li saċerdoti studjużi tal-Bibbja jagħmlu preżentazzjoni qasira ta’ katekeżi.
Il-knejjes li fihom se jsiru dawn iċ-ċelebrazzjonijiet huma dawn: Knisja tal-Madonna tal-Karmnu, Knisja tal-Ġiżwiti, Knisja ta’ San Duminku, Knisja ta’ Santu Wistin, Knisja Ta’ Ġieżu, Knisja ta’ San Franġisk u Knisja ta’ San Ġakbu.
L-ewwel ċelebrazzjoni f’dawn is-sena’ knejjes ssir fit-3.00pm. F’kull knisja jkun hemm ripetizzjoni taċ-ċelebrazzjoni kull tliet kwarti ta’ siegħa: fl-3.45pm, fl-4.30pm, fil-5.15pm u fis-6.00pm. Hekk in-nies ikunu jistgħu jmorru minn knisja għal oħra u jie]du sehem f’esperjenzi diversi.
Fil-Kappelli tal-Monasteri ta’ Sant’Ursula u ta’ Santa Katerina se jkun hemm Adorazzjoni fis-skiet.
Fil-wesgħat ta’ Bieb il-Belt, Kastilja, quddiem il-bini tal-Qorti, quddiem il-Palazz u quddiem is-Suq tal-Belt, kif ukoll fit-toroq fejn hemm il-knejjes li fihom se ssir ċelebrazzjoni, se jkun hemm membri ta’ movimenti reliġjużi jkantaw kant reliġjuż u jagħtu tagħrif lill-pubbliku dwar iċ-ċelebrazzjonijiet tal-ġurnata.
Wara li jintemmu ċ-ċelebrazzjonijiet, f’uħud mill-knejjes se jkun hemm Quddiesa.
