L-EWWEL ITTRA LILL-KORINTIN
KALENDARJU GĦAS SENA PAWLINA - FRAR 2009
1 ta’ Frar
Ma tafux li intom tempju ta’ Alla u li l-Ispirtu ta’ Alla jgħammar fikom? (3, 16)
Naf li ġismi hu sabiħ u qaddis. Għad iqum mill-imwiet.
2 ta’ Frar
Jekk xi ħadd jeqred it-tempju ta’ Alla, Alla jeqred lilu. Għax qaddis hu t-tempju ta’ Alla, li huwa intom. (3, 17)
Nieħu ħsieb dan ġismi mingħajr ma nfissdu żżejjed.
3 ta’ Frar
Ħadd ma għandu jitqarraq! Jekk xi ħadd fostkom jaħseb li hu għaref f’din id-dinja, ħa jiblieh, biex isir għaref. (3, 18).
L-għerf ta’ Alla huwa Ġesú Kristu fuq is-salib, mogħti bl-imħabba għal ħajja tagħna.
4 ta’ Frar
Għax l-għerf ta’ din id-dinja hu bluha quddiem Alla. (3, 19)
Il-bluha tal-bniedem mhux dejjem kapaċi tagħraf l-għerf ta’ Alla.
5 ta’ Frar
Kollox hu tagħkom u intom ta’ Kristu, u Kristu ta’ Alla.
(3, 22d-23)
Jien kollni kemm jien ta’ Alla!
6 ta’ Frar
Ma tafux li ftit ħmira ttalla’ l-għaġna kollha? (5, 6)
X’tagħmel il-ħmira meta titħallat mad-dqieq? Hekk in-Nisrani awtentiku fl-ambjent fejn jaħdem jew jgħix.
7 ta’ Frar
Tnaddfu mill-ħmira l-qadima ħalli tkunu għaġna ġdida. (5, 7)
Il-ħmira l-qadima mhix għajr id-dnub. Inneħħi minni l-ħażin biex jgħammar fija l-bniedem il-ġdid.
8 ta’ Frar
Kull wieħed għandu d-don tiegħu mingħand Alla: min ħaġa u min oħra. (7, 7)
Kuntent/a bid-doni u t-talenti li silifni Alla?
9 ta’ Frar
Kull wieħed jibqa’ fl-istat li l-Mulej kien tah meta sejjaħlu Alla. (7, 17)
Jekk m’iniex kuntent bl-istat li ninsab fih nistaqsi lili nnifsi jekk hux qed ngħixu kif jixtieq minni Alla jew le.
10 ta’ Frar
Meta jien wasalt għandkom, ħuti, ma ġejtx inħabbrilkom il-Misteru ta’ Alla bi kliem kbir jew għaref. Ma ppretendejtx li kont naf xi ħaġa fostkom, ħlief lil Ġesù Kristu, u ’l dan imsallab. U jiena ġejt għandkom dgħajjef, mbeżża’ u mriegħed; il-kelma u l-predikazzjoni tiegħi ma kinux imlibbsa bil-kliem qawwi tal-għerf, imma bil-wiri tal-Ispirtu u l-qawwa, sabiex il-fidi tagħkom tinbena mhux fuq l-għerf tal-bniedem, imma fuq il-qawwa ta’ Alla. (2, 1-5)
Ġesù Kristu msallab huwa ċ-ċentru tal-univers u ċ-ċentru tal-istorja personali tiegħi.
11 ta’ Frar
Aħna ngħallmu… l-għerf ta’ Alla moħbi f’misteru, li Alla fassal qabel iz-żmien għall-glorja tagħna. (2, 6a-7)
Sa mill-eternità Alla ppjana li jien nkun maħluq biex miegħi jaqsam l-imħabba tiegħu u ngħix f’għaqda waħda miegħu.
12 ta’ Frar
Aħna nħabbru dak li għajn qatt ma rat u widna qatt ma semgħet. U dak li qatt ma tnissel f’qalb il-bniedem, dak Alla lesta għal dawk li jħobbuh. ((2, 9)
Nemmen fil-ħajja sabiħa li għad trid tiġi wara din il-ħajja li tgħaddi.
13 ta’ Frar
...għax l-Ispirtu jgħarbel kollox, sa fil-qiegħ ta’ Alla. (2, 10b)
Nemmen fil-qawwa tal-Ispirtu s-Santu li tgħarbel kollox.
14 ta’ Frar
Aħna ma ħadniex l-ispirtu ta’ din id-dinja, imma l-Ispirtu ta’ Alla, biex nagħrfu d-doni li Alla għoġbu jagħtina. (2, 12)
L-Ispirtu ta’ Alla jgħinni nagħraf li jiena mogħni b’diversi talenti.
15 ta’ Frar
Il-bniedem naturali ma jilqax il-ħwejjeġ tal-Ispirtu ta’ Alla; għalih huma kollha bluha, ma jistax jifhimhom, għaliex ħadd ma jista jgħarbilhom jekk mhux bl-Ispirtu. (2, 14)
Meta nsibha bi tqila biex nifhem jew naċċetta xi tagħlim tal-Vanġelu, nitlob lil Alla jagħtini l-Ispirtu tiegħu biex idawwalni.
16 ta’ Frar
Il-bniedem spiritwali jgħarbel kollox, u lilu ma jgħarblu ħadd. (2, 15)
Ir-relazzjoni tiegħi ma’ Alla tagħtini l-kapaċità li nara l-affarijiet kif verament huma.
17 ta’ Frar
Min hu dak li jista’ jifhem il-ħsieb tal-Mulej? (2, 16)
Ma nistax nippretendi li naf x’inhu l-aħjar għalija jew għall-oħrajn, aktar milli jaf il-Mulej.
18 ta’ Frar
Ir-raġel għandu jagħti lil martu li jmissha, hekk ukoll il-mara lil żewġha. (7, 3)
Ir-raġel Nisrani jieħu ħsieb li jkun ta’ servizz lejn martu u l-mara lejn żewġha.
19 ta’ Frar
Lil dawk li huma miżżewġin nordnalhom, mhux jien, iżda l-Mulej, li l-mara ma għandhiex tħalli lil żewġha, (7, 10)
Għan-Nisrani, l-imħabba tal-miżżewġin hija qaddisa, għalhekk bħal Alla għandha tibqa’ għal dejjem.
20 ta’ Frar
Jekk tiġi li tħallih għandha tibqa’ bla tiżżewweġ jew terġa’ tagħmel paċi ma’ żewġha. (7, 11)
Il-mara miżżewġa hija marbuta ma’ żewġha fil-Mulej, għalhekk hija rabta li tikber u tisbieħ u mhux tintemm.
21 ta’ Frar
U r-raġel ma għandux jitlaq lil martu. (7, 11 )
In-Nisrani ma jistax jaqbel mad-divorzju.
22 ta’ Frar
Ir-raġel li ma jemminx jitqaddes permezz ta’ martu, u l-mara li ma temminx titqaddes b’ħuha (7,14)
Il-miżżewġin insara jgħinu lil xulxin jikbru fl-imħabba tagħhom lejn Alla fil-knisja.
23 ta’ Frar
Tafx int, mara, jekk issalvax lil żewġek, jew int, raġel, jekk issalvax lil martek? (7,16)
Ir-raġel miżżewweġ ma jistax isalva mingħajr ma jipprova jgħin lil martu toqrob lejn Alla, u l-istess il-mara.
24 ta’ Frar
Dan ngħidilkom, ħuti: iz-żmien qsar, ħa jkunu, mela dawk li għandhom mara, bħallikieku ma għandhomx… (7, 29)
Meta nikber fir-relazzjoni tiegħi ma’ Ġesù nsir aktar liberu, u nkun inqas niddependi minn persuni, sitwazzjonijiet jew oġġetti.
25 ta’ Frar
Ngħakkes bl-aħrax lil ġismi u njassru, biex ma jiġrilix li, wara li nkun ippritkajt lil ħaddieħor, jiena stess insib ruħi kkundannat. (9, 27)
L-ispirtu ta’ sagrifiċċju jgħinni nikkontrolla l-emozzjonijiet u l-bżonnijiet fija li jbegħduni minn dak li jixtieq Ġesù.
26 ta’ Frar
Missirijietna lkoll… xorbu tassew mill-blata spiritwali li kienet timxi magħhom, u din il-blata kienet Kristu. (10, 1- 4)
L-ilma li tassew jaqtagħli l-għatx ta’ qalbi huwa Ġesú Kristu u l-imħabba tiegħu fil-Knisja.
27 ta’ Frar
Min jidhirlu li hu wieqaf, joqgħod attent li ma jaqax. (10, 12)
Jekk nimla rasi li jien xi ħaġa faċli nieħu tisbita, u jkun diffiċli naċċettaha.
28 ta’ Frar
Alla hu fidil u ma jħallikomx tiġġarrbu aktar milli tifilħu; jaħseb li mat-tiġrib jagħtikom il-qawwa u l-għajnuna biex tkunu tifilħu għalih. (10, 13)
Kull tentazzjoni hija okkażjoni oħra biex nagħmel għażla ċara u determinata favur il-Mulej Ġesù.
