STQARRIJA TA’ L-ARĊISQOF TA’ MALTA
U L-ISQOF TA’ GĦAWDEX
L-abort huwa qtil
L-ewwel dritt u l-iktar fundamentali tal-bniedem huwa d-dritt għall-ħajja. Min ma jibqagħlux il-ħajja ma jista’ jgawdi l-ebda dritt jew benefiċċju ieħor f’din id-dinja.
Għalhekk, għalina li nemmnu, għandna nirringrazzjaw lill-Mulej tar-rigal tal-ħajja li huwa tana. Permezz ta’ dan ir-rigal nistgħu ngawdu l-ħolqien u l-mixja tagħna f’din id-dinja. Minħabba f’hekk ukoll aħna għandna d-dmir li niddefendu l-ħajja ta’ kull bniedem, u l-aktar ta’ dawk li huma dgħajfa u ma jistgħux jiddefendu lilhom infushom.
Il-Knisja tgħallem li l-ħajja tal-bniedem jeħtiġilha ħarsien u rispett sa mill-ewwel mument ta’ l-eżistenza tagħha. Għalhekk kull abort li jkun frott tar-rieda tagħna huwa moralment ħażin. Is-Sid tal-ħajja huwa Alla u ebda liġi tal-bniedem jew rieda tal-poplu ma tista’ tibdel dan il-fatt.
Aħna, bħala Rgħajja tal-poplu Malti qed inħossu r-responsabbiltà li nfakkru dan. L-abort mhuwiex għażla. L-abort huwa qtil. L-abort mhuwiex dritt. L-abort huwa caħda ta’ dritt. L-abort mhux ta’ ġid għas-soċjetà. L-abort huwa qerda tal-bniedem u tas-soċjetà ċivili.
Inħeġġu lil kull min hu nisrani veru biex iħaddan din il-verità b’mod sħiħ.
Inħeġġu lil kull nisrani biex jaħdem ħalli dan ikun ukoll fil-qafas tas-soċjetà Maltija. Irridu nifirħu u nkunu kburin fil-protezzjoni tat-tarbija fil-ġuf. Pajjiżna hu differenti minn pajjiżi oħrajn anke jekk ikun waħdu. L-ewwel komunità nisranija kienet tiftaħar li kienet differenti fid-dinja Lhudija u Rumana fil-valuri li kien taha Sidna Ġesù Kristu.
Nappellaw lill-Maltin u l-Għawdxin ħutna biex jitolbu lill-Mulej jagħtina d-dawl tal-grazzja tiegħu biex nibqgħu ngħożżu dan id-don tal-ħajja kif ukoll ngħinu lil kull min isib ruħu f’diffikultà u jkun qed jaħseb biex jagħmel jew ġa għamel abort. Nappellaw ukoll lill-membri tal-professjoni medika u paramediċi biex iwettqu l-missjoni tagħhom favur il-ħajja u s-saħħa tal-bniedem bil-fedeltà u jgħinu lill-bnedmin isibu l-fejqan u mhux il-mewt, u nitolbu wkoll lill-Mulej jgħinhom fit-twettiq ta’ din il-missjoni.
PAWL CREMONA O.P.
Arċisqof ta’ Malta
MARIO GRECH
Isqof ta’ Għawdex