Gozo Diocese

Omelija fit-tifkira tas-Sejħa tal-Verġni mbierka lil Karmena Grima
Santwarju tal-Verġni Marija Ta’ Pinu, l-Għarb, Għawdex
Il-Ġimgħa 22 ta’ Ġunju 2007
L-E.T. Mons. Mario Grech, isqof ta’ Għawdex

IL-VERITÀ TAGĦMILKOM ĦIELSA (Ġw 8,32)

Ir-rakkont ta’ Kana li għadna kif qrajna fil-Vanġelu fost ħwejjeġ oħra jindikalna illi min ma jiqafx jaħseb daqsxejn qabel jaġixxi, u min iħalli lilu nnifsu jinħakem mill-ferneżija tal-ħajja jew mill-konfużjoni, jiġrilu bħalma ġralhom l-għarajjes ta’ Kana, illi naqsilhom element importanti tal-festa: l-inbid.

Nistaqsi jekk huwiex il-każ illi fil-ħajja tagħna tant aħna għaddejjin b’ritmu mgħaġġel u tant aħna mifruxin fil-ħsieb tagħna li l-konfużjoni u d-diżorjentament qishom saru parti mill-ħajja, u qegħdin fir-riskju li f’ħajjitna nwarrbu jew nitilfu elementi importanti, biex ma ngħidx il-fundament tal-ħajja tagħna. Għax min jaġixxi mingħajr ħsieb jew mingħajr ma joqgħod iqis u jiżen, ir-riskji li jiżbalja huma kbar.

Jiena ma nixtieq nara lil ħadd iwettaq dawn it-tip ta’ żbalji, la bħala individwi, la bħala familji u anqas fuq livell soċjali. Jekk ma nagħrfux il-bżonn illi nnaqqsu ftit mir-ritmu ta’ l-għaġla biex nirriflettu u niżnu qabel ma ngħidu u niddeċiedu, ħa jonqosna l-inbid jekk mhux diġà beda jonqos.

Dak li qed ngħid għall-ħajja privata nħoss li għandi ngħidu għall-ħajja pubblika, b’mod partikulari għal dawk l-individwi u entitajiet li l-uffiċċju tagħhom ipoġġihom f’pożizzjoni li b’dak li jgħidu, jagħmlu u jiddeċiedu sejrin jew qegħdin isawru l-ħajja ta’ ħafna u qegħdin jagħtu direzzjoni lis-soċjetà.

Is-sejħa tal-Madonna: nieqfu fil-preżenza ta’ Ġesù
Illum qegħdin nagħmlu din il-festa ta’ meta l-Verġni mbierka minn din il-kappella tefgħet il-ħarsa tagħha fuq mara sempliċi li kienet għaddejja fuq xogħolha. X’qaltilha l-Verġni Marija f’din il-vuċi li Karmena Grima semgħet ħierġa mill-kappella Ta’ Pinu? “Ejja, ejja, ejja”. Xi tfisser din is-sejħa?

Nifhem li l-Verġni mbierka sejħet lil Karmena biex tieqaf ftit mill-attività tal-ħajja u tiġi proprju fil-preżenza ta’ l-imgħallem Ġesù, u hemmhekk hija jirnexxielha taħseb. Din ir-riflessjoni tagħmilha mhux billi ddur fuqha nfisha, bil-ħila intellettwali tagħha biss, imma billi taħseb b’moħħ u b’qalb li huma mdawlin minn Alla. Hija sejħa li l-Verġni mbierka għamlet lil Karmni ħalli tieqaf u titlob, fis-sens li tiddisponi lilha nfisha biex tħalli lill-Ispirtu ta’ Alla jdawlilha l-ħsieb tagħha u jirrivelalha l-verità biex hija tkun iktar ħielsa, għax kif insibu f’San Ġwann, “il-verità tagħmilkom ħielsa” (Ġw 8,32).

Għiduli intom jekk illum hemmx bżonn li nħallu din il-vuċi ta’ Marija tasal fil-kuxjenza tagħna: “Ejjew u poġġu lilkom infuskom fil-preżenza ta’ Ibni l-Mulej Ġesù, li huwa l-verità”; dak illi San Ġwann fil-prologu tal-Vanġelu tiegħu jgħid għalih: ‘Fih seħħew il-grazzja u l-verità… Fih hemm tassew il-milja tal-grazzja u tal-verità’ (ara Ġw 1:16-17)”. Inpoġġu fil-preżenza ta’ Ġesù; iInsibu ftit ħin għas-skiet interjuri u nħallu l-verità ta’ Alla ddawwalna biex id-deċiżjonijiet li nieħdu jew nipproponu jkunu deċiżjonijiet li jaqblu mal-verità; dik il-verità li ma joħloqhiex il-bniedem kif ifettillu jew għax iċ-ċirkustanzi tagħna hekk jitolbu jew jindikawlna. Mela l-verità hija daqshekk relattiva fis-sens li lbieraħ kienet mod u llum ieħor?! Il-verità ma titbiddilx.

Jekk ma rridux nibqgħu mexjin b’din il-ħajja ttraxxnata u nsibu il-ħin biex inwieġbu għal din il-vuċi, rridu npoġġu lilna nfusna fil-preżenza ta’ Alla ħalli hu jgħarrafna l-verità u hekk niksbu l-ħelsien veru. Il-verità tgħinek tpoġġi ħajtek fl-ordni tagħha, tgħinek tirbaħ id-diżordni. Hemm indikazzjonijiet li għandna diżordni sew fil-ħajja individwali, sew f’tal-familja u sew fil-ħajja soċjali tagħna. Sakemm aħna ma nħallux il-verità ta’ Alla tmexxina, sa nibqgħu mingħajr inbid fil-ħajja.

F’Ġesù Kristu l-bniedem isib il-verità
Din il-verità li qed nitkellmu fuqha m’hix biss verità filosofika jew psikoloġika, imma għal min jemmen il-Vanġelu jagħti verità partikulari li dehret fil-persuna ta’ Ġesù Kristu, li fuq wiċċu idda d-dawl ta’ wiċċ Alla fil-ġmiel kollu tiegħu. Kristu huwa t-triq, il-verità u l-ħajja (ara Ġw 14,6). Għalhekk it-tweġiba deċiżiva għal kull problema tal-bniedem, speċjalment il-problemi reliġjużi u morali, jagħtiha Ġesù; anzi t-tweġiba hija Ġesù Kristu nnifsu. Kif jgħallem il-Konċilju Vatikan II “hu biss fil-misteru tal-Verb magħmul bniedem li verament jidher ċar il-misteru tal-bniedem” (Gaudium et spes 22).

Ġesù Kristu jgħallimna verità li ebda moħħ, intelliġenti kemm huwa intelliġenti, ma hu sa jasal għaliha: il-verità li Alla tant ħabb lid-dinja li ta lil Ibnu biex kulmin jemmen fih isalva. Dan l-Iben tant ħabbna li ta lilu nnifsu għalina. Din hija verità teoloġika li tisboq il-verità filosofika u tipperfezzjonaha. Il-komunità kristjana għandha bżonn tissaħħar wara l-persuna ta’ Ġesù Kristu, illi jirrivelalna l-qawwa ta’ l-imħabba ta’ Alla għalina, biex imbagħad inkunu nistgħu ngħixuha. Ħafna sitwazzjonijiet fil-ħajja nsolvuhom biss jekk fina u fostna hemm l-imħabba kristjana.

Il-Verġni mbierka, li sejħet lil Karmena Grima biex tieqaf quddiem Ġesù, żgur li qaltilha dak li qalet lill-qaddejja ta’ Kana: “Agħmel dak li jgħidlek Ibni” (ara Ġw 2,5). Dan huwa l-messaġġ li nixtieq nafdalkom f’din il-ġurnata tant għażiża għall-Knisja f’pajjiżna: inħallu din il-vuċi tinżel fil-fond ta’ qalbna u fis-skiet noqogħdu fil-preżenza ta’ l-imgħallem Ġesù. Akbar m’int aktar int fid-dmir li toqgħod fil-preżenza tal-verità, għaliex dak li tgħid, tagħmel u tiddeċiedi sa jaffetwa lil ħafna. Noqogħdu fil-preżenza tal-Verità biex imbagħad inkunu aħbar tajba għas-soċjetà ta’ madwarna u jirnexxilna nevitaw li fil-ħajja, għalkemm jista’ jkollna ħafna, inkunu tlifna dak li huwa essenzjali.

DUN ĠORĠ U L-KELMA LI TGĦAMMAR FOSTNA

Omelija fiż-Żjara tar-Relikwa ta’ San Ġorġ Preca f’Għawdex
Il-Katidral ta’ Għawdex, Victoria
It-Tlieta 5 ta’ Ġunju 2007
L-E.T. Mons. Mario Grech, isqof ta’ Għawdex

Li Dun Ġorġ kien qassis tajjeb nafuh ilkoll; kważi ma kellniex bżonn il-konferma tal-Knisja fuq dan. Il-fatt li Dun Ġorġ issa huwa qaddis lili ma jżidli xejn fl-imħabba u l-ammirazzjoni li kelli lejh. Imma din il-ġrajja tqanqalli xi mistoqsijiet: kif wieħed jasal biex ifisser l-entużjażmu u l-ħeġġa li dehru fil-poplu tagħna f’din il-ġrajja? X’ġiegħel ħamest elef Malti u Għawdxi jagħmlu sagrifiċċju u jmorru Ruma għal din iċ-ċelebrazzjoni (tal-kanonizzazzjoni ta’ Dun Ġorġ)? X’wassal biex tant minn ħutna fil-parroċċi li żorna llum – Għajnsielem, il-Qala, in-Nadur, San Ġorġ u issa hawnhekk fil-Katidral, joħorġu bi ħġarhom? X’hemm li jqanqalkom f’Dun Ġorġ?

Xandâr tal-Vanġelu
Żgur li m’hix ir-relikwa, għax naf li intom maturi biżżejjed. Ir-relikwa hija sinjal importanti u nagħmlu sewwa li nuru esternament il-qima tagħna lejha; imma naf li f’qalbkom jekk ikollkom titkellmu hemm tweġiba oħra li jien sa nipprova niġbor u nesprimi. F’Dun Ġorġ nilmħu xandâr tal-Vanġelu, u jien l-ebda tifsira oħra ma tissodisfani jekk ma tiqafx u tirrifletti fuq dan is-saċerdot li għex għall-Vanġelu. Mhux ta’ b’xejn li kellu għal qalbu dik is-sentenza mill-prologu ta’ San Ġwann: “Il-Verb sar bniedem u għammar fostna”!

Nazzjon f’salib it-toroq
Nemmen li Alla ma jagħmel xejn b’kumbinazzjoni u nħossni konvint illi f’dawn iż-żminijiet partikulari li qegħdin ngħixu bħala nazzjon ninsabu f’salib it-toroq għax irridu nieħdu ċerti deċiżjonijiet fil-kamp ta’ l-ekonomija, tax-xjenza, tal-politika, f’dak leġislattiv u fir-rigward tal-familja. L-istess poplu li llum qiegħed jiċċelebra lil Dun Ġorġ irid jagħmel ċerti għażliet.

X’għażliet sa nagħmlu jekk mhux dawk li huma mnebbħin mill-Vanġelu? Nixtieq ħafna li din l-imħabba straordinarja li qed nuru f’dawn il-jiem tissarraf f’impenn biex inxandru l-Vanġelu u biex nevanġelizzaw.

Komunità mkissra fil-Kelma
Meta kont Ruma ġew diversi ġurnalisti jistaqsuni fuq Dun Ġorġ. Wieħed minnhom staqsieni x’naħseb li sa tkun tfisser din iċ-ċelebrazzjoni għall-Knisja f’pajjiżna. Ħassejt li għandi nwieġeb li dan huwa mument ta’ grazzja fejn ilkoll kemm aħna nagħrfu iktar il-Vanġelu, għaliex għandi l-impressjoni li aħna għadna ma ppenetrajniex il-Vanġelu u l-għarfien tagħna huwa wieħed superfiċjali. Intom tafu kemm bħala isqof tagħkom nixtieq li nkunu komunità li tagħmilha mal-Kelma; komunità li tagħraf “Leħen il-Maħbub”, kif kien isejjaħlu Dun Ġorġ.

Illum nitlob din il-grazzja għad-djoċesi tagħna: li lkoll kemm aħna nimpenjaw verament ruħna biex inkunu komunità mkissra fil-Kelma. B’dan il-mod imbagħad il-preżenza tagħna fid-dinja tagħmel differenza, u jekk is-soċjetà tagħna ssib ruħha f’salib it-toroq ma nibżgħux nintervjenu ta’ bnedmin imlaqqmin bil-Kelma. Aħna nemmnu li Kristu huwa l-verità, u jekk aħna nipproponu l-verità lil ħaddieħor ma nkunu nnaqqsulu xejn, anzi nkunu qegħdin nagħtuh servizz. Jekk jien nagħti xhieda tal-verità, il-verità kollha, ma nkun qed nirfes id-dritt ta’ ħadd. Għall-kuntrarju, inkun qed inħares dawn id-drittijiet. Hemm bżonn li l-veritajiet tal-Vanġelu mhux biss inkunu nafuhom b’konvinzjoni, imma jkollna l-kuraġġ li nipproklamawhom u ma nistħux nistqarru t-twemmin tagħna, anki f’soċjetà lajka.

Il-Kelma ssir laħam illum
Kulħadd sema’ bil-purċissjoni tal-Milied li kienet tant għal qalb Dun Ġorġ. Dak il-misteru ta’ l-Inkarnazzjoni li seħħ f’Betlehem u li Dun Ġorġ kien jiċċelebrah b’tant enfasi ta’ kull sena, għadu jitwettaq sal-ġurnata tal-lum. Din il-Kelma ta’ Alla llum ukoll ssir laħam, illum ukoll tieħu sura, espressjoni u manifestazzjoni umana. Min sa jagħtiha din is-sura jekk mhux aħna lkoll? Għalhekk jekk tassew inħobbu lil Dun Ġorġ u nixtiequ li nipperpetwaw il-festa tal-Milied, jeħtieġ li f’dawn l-oqsma li semmejtilkom u oqsma oħra aħna nkunu dak li l-papa Benedittu qal nhar il-Ħadd lli għadda, meta sejjaħlu “eku fidil tal-Kelma ta’ Alla”.

Ix-xandir tal-Kelma u l-lajċi
Dan il-ministeru tal-Kelma Dun Ġorġ wettqu mhux biss bil-predikazzjoni, bit-tagħlim u bil-kitba, imma wkoll fil-konfessjonarju u fid-direzzjoni spiritwali. Nirrikmandalkom li nerġgħu nieħdu f’idejna d-diskors li għamel il-Papa fl-omelija ta’ nhar il-Ħadd. Ix-xandir tal-Kelma m’hux xogħol tagħna s-saċerdoti biss, imma tal-komunità kollha kemm hi. Anzi hemm ċerti oqsma fil-ħajja li huma kamp proprju u speċifiku tagħkom il-lajċi, għax aħna s-saċerdoti ma nistgħux inkunu preżenti. Anki f’din il-ħaġa Dun Ġorġ Preca antiċipa ż-żminijiet tagħna meta għaraf il-valur tal-lajċi, u dan għamlu mhux biss billi fdalhom il-Kelma, li kienet xi ħaġa straordinarja dakinhar, imma wkoll billi ħass li għandu jsawwarhom biex ikunu bħal ħmira fid-dinja fejn jgħixu u jaħdmu biex bil-preżenza tagħhom iqaddsu d-dinja ta’ madwarhom.

Dun Ġorġ u l-“Magnificat”
Qegħdin fil-katidral iddedikat lill-Assunta. Dun Ġorġ kellu mħabba speċjali lejn il-Verġni Marija. Nimmaġina li l-għanja ta’ radd il-ħajr li kantat Marija fil-Magnificat kienet ukoll l-għanja ta’ Dun Ġorġ. Għax kif il-Missier mar jafda l-Verb fil-ġuf ta’ Marija għax ra fiha l-qaddejja umli tiegħu, hekk ukoll Alla lil Dun Ġorġ fdalu l-Verb biex għamlu xandâr tal-Vanġelu. Alla għażlu għax bħal Marija kien umli, ċkejken u dgħajjef. Imma aktar minn hekk: bħalma l-Missier mar jafda l-Kelma ’l Marija biex il-Kelma saret laħam, Dun Ġorġ jafda l-Kelma lis-soċji tiegħu biex jinkarnawha fid-dinja!

Inħossni fid-dmir li ngħid kelma ta’ apprezzament lilkom, għeżież ulied is-Soċjetà tal-Museum, li fakkartu l-mitt sena mill-bidu tas-Soċjetà. Għandna bżonnkom biex tgħinuna fil-ħidma ta’ evanġelizzazzjoni u, jekk Alla jrid, naslu anki fil-ħidma ta’ katekeżi ma’ l-adulti.

Filwaqt li llejla rroddu ħajr lil Alla, nerġa’ nappellalkom tistaqsu x’inhi r-raġuni ta’ din il-ġirja li għadha ma waqfitx hawn, għaliex jekk Alla jrid nhar il-Ħamis ukoll immorru fuq il-Fosos biex nagħtu xhieda u nagħmlu esperjenza ta’ Knisja. X’inhi r-raġuni li tiġbidna wara Dun Ġorġ? It-tweġiba hija waħda: għax Dun Ġorġ issaħħar wara Kristu u ma waqafx qabel ma għadda lil Kristu lil oħrajn.

ĦELSIEN VERU

Omelija ta’ Mons Isqof Mario Grech fl-okkażjoni ta’ l-ewwel dehra tal-Madonna ta’ Fatima u fil-ftuħ tal-“Kampanja favur ambjent moralment nadif” (Knisja ta’ Ħamet – 15 ta’ Mejju 2007).

Fl-Atti ta’ l-Appostli (16,22-34) naqraw li Pawlu u sħabu bil-qawwa tat-talb u l-kant ta’ l-innijiet lil Alla nħelsu mill-irbit tal-ktajjen u kienu ħielsa. Mhux hekk biss, imma dan kollu ġab stagħġib fl-għassies; x’ħin ra lil Pawlu u lil sħabu meħlusa minn kull irbit, huwa stess staqsa x’għandu jagħmel biex isalva, jew ahjar biex hu wkoll ikun “ħieles”.

Illum il-bniedem huwa mxekkel, għandu irbit li jista’ jkun ġej minn ktajjen ħoxnin u oħrajn inqas ħoxnin; ħafna drabi l-bniedem għandu piż ma’ riġlejh li jfixklu milli jimxi; kemm jekk jkun piż moderat u kemm jekk ikun tqil, il-mixi tiegħu ikunu imxekkel. Anzi, xi darba l-mażra tkun tant tqila li l-bniedem jistalla u ma jagħmel ebda pass!

Imma mbagħad il-bniedem li bħal Pawlu jemmen f’Alla u jiftaħ qalbu għaliH, jaf iġarrab il-qawwa ta’ Alla u jagħmel l-esperjenza tal-ħelsien! Jaf ikun hemm terremot f’ħajtu li jgħinu jinħeles minn dak kollu illi qiegħed jorbtu u jnaqqarlu il-libertà.

Meta llum qegħdin infakkru l-ewwel dehra tal-Madonna ġewwa Fatima, qegħdin ukoll inniedu kampanja favur ambjent moralment nadif fid-djoċesi. Nappellalkom biex fil-ġimgħat li ġejjin nirriflettu u nieħdu azzjoni dwar x’inhu meħtieġ biex tassew ikollna ambjent moralment nadif. Għaldaqstant f’din iċ-ċirkustanza, xieraq nirriflettu dwar x’tip ta’ rbit jew xkiel immorali hemm fil-ħajja tagħna u li aħna għandna neħilsu minnu.

Iż-żmien tas-Sajf qed joqrob. Irridu nagħtu każ ta’ ċerta immoralità li teżisti f’dak li huwa atteġġjamenti, ilbies u kliem. Meta nhar il-Ħadd kont mal-komunità parrokkjali ta’ San Ġorġ, fid-dawl tal-qari meħud mill-Atti ta’ l-Appostli (15,28) appellajt biex kemm jista’ jkun inżommu s-santwarju tal-qalb tal-bniedem nadif, partikularment miż-żìna. Din ix-xorta ta’ immoralità qegħda taqbad f’pajjiżna, fil-kbar u fiż-żgħar. Il-Papa Benedettu XVI fiż-żjara li qiegħed jagħmel fil-Brażil ukoll appella ħalli l-insara jaħarbu ż-żìna u jikkomettu lilhom nfushom sabiex jissieħbu f’kampanja ħalli jkollna ambjent li tassew jirrispetta l-ġisem tal-bniedem u li aħna nuru li nemmnu tassew li l-ġisem tagħna huwa tempju ta’ l-Ispirtu s-Santu. Il-ġisem huwa nobbli u għandna nkunu attenti biex ma nċedux għal dak kollu li jtappan din id-dinjità u din is-sagralità tiegħu. Huwa fatt li din it-tip ta’ immoralità tiġġenera problemi oħrajn. U min għandu widnejn biex jisma, ħa jisma.

Forsi tistaqsuni: kif ser immorru kontra l-kurrent tad-dinja u kif ser niksbu dan il-ħelsien? Dan nagħmluh bil-qawwa tat-talb. Wieħed jawgura li l-imġiba u l-istess reżistenza tagħna għal ċertu stil ta’ ħajja jqanqal fl-oħrajn domanda simili għal dik li għamel l-għassies meta osserva l-ħelsien li ġarrbu Pawlu u sħabu: “Għiduli x’għandi nagħmel biex jien ukoll nikseb dan il-ħelsien tal-qalb u nkun kapaċi ngħix ċerti valuri fil-ħajja tiegħi ta’ kuljum”.

Ġewwa Fatima l-Madonna dehret diversi drabi imma l-messaġġ tagħha huwa wieħed biex nikkonvertu, biex jirnexxilna negħlbu d-dnub u hekk naraw dak li huwa sabiħ. Il-gmiel li kienet tirrifletti Marija f’ilbiesha u fil-persuna tagħha, li ġibed l-attenzjoni tat-tliet rgħajja ċkejknin, huwa ġmiel li jista’ jirrifletti fil-ħajja tagħna jekk aħna fil-ħajja interjuri u anke esterjuri ngħixu dawk il-valuri li tgħallimna r-reliġjon kattolika, u jekk aħna jirnexxilna ngħixu l-vera ħajja morali kif iridna l-Imgħallem Ġesù.

Imma l-gwaj huwa dak li jgħid il-Vanġelu: li tlifna s-sens tad-dnub! Jeħtieġ li aħna niskopru l-kruha tad-dnub; li kull wieħed u waġda minnha nimpenjaw lilna nfusna biex xejn fil-ħajja tagħna ma jwassalna biex nitilfu l-ħajja tal-grazzja. Dan jikkawża fina d-dnub: itellifna l-ħbiberija tagħna ma’ Alla. U meta nitilfu din il-ħbiberija u jkunx hemm din il-grazzja, fejn m’hemmx il-preżenza ta’ Alla fil-bniedem nitilfu wkoll dak il-ġmiel li kien rifless f’Marija.

Għalhekk, filwaqt li nkomplu din il-ħajja li hija sejħa għal konverżjoni kontinwa, filwaqt li nimmiraw biex fil-ħajja tagħna ta’ kuljum nilħqu ċerti valuri u ngħixu l-virtujiet insara, nagħmlu wkoll ħilitna biex bi kliemna u għemilna nikkontribwixxu biex ikollna ambjent moralment nadif.

Il-Verġni mbierka ta’ Fatima tieqaf magħna.

DUN ĠORĠ PRECA: XANDÂR TAD-DUTTRINA TAJBA

Hija ħaġa li timliek bil-ferħ meta tara l-poplu ta’ Alla miġbur f’din l-okkażjoni li ċertament hija ġrajja storika għall-Knisja lokali u għal pajjiżna. Inħoss x’jgħidli li dan il-mument tal-kanonizzazzjoni ta’ Dun Ġorġ huwa mument ta’ grazzja għall-Knisja tagħna, u nkunu irresponsabbli quddiem Alla u quddiem id-dinja jekk inħallu dan il-mument ta’ grazzja jgħaddi u ma jqanqalniex biex aħna wkoll ninbnew bħala ġens qaddis, b’tama qawwija li Dun Ġorġ jistimulana ħalli l-poplu tagħna jkompli jikber fil-qdusija.

“Kulma smajt mingħandi” (2 Tim 2:2)
Is-silta li qrajna mit-tieni ittra ta’ San Pawl lil Timotju (2,1-15) toffri wieħed mit-testi li jistgħu jispirawna biex inpoġġu l-pedament ta’ dan il-ġens qaddis, tal-Knisja lokali. Kif qalli l-postulatur tal-kawża, Mons. Charles Scicluna – li nixtieq nirringrazzjah għax-xogħol li għamel biex illum ninsabu lejlet din il-kanonizzazzjoni – , Dun Ġorġ kien jikkunsidra dan il-qari bħala l-“pedament ta’ l-opra tiegħu”. Jiena sa nieħu sentenza waħda minn din is-silta: meta Pawlu jeżorta lil Timotju biex “kulma smajt mingħandi għaddieh lil nies ta’ fiduċja, biex huma stess ikollhom il-ħila li jgħallmuh ukoll lil oħrajn” (2 Tim 2,2).

Din il-kelma għandha tidwi fi qlubna, fil-komunitajiet tagħna, fil-Knisja tagħna. San Pawl jitlobna ngħożżu t-tagħlim li ħallielna l-Mulej Ġesù biex ngħadduh lill-oħrajn. Għal liema tagħlim qed jirriferi Pawlu?

It-tweġiba nsibuha fl-ewwel ittra lil Timotju meta Pawlu jikteb li “l-liġi m’hix magħmula għal dawk li huma tajbin, imma għal dawk li huma bla liġi u bla rażan, ħżiena u midinbin, bla reliġjon u sagrilegi, qattiela ta’ missirijiethom u ommijiethom, qattiela, żienja, sodomi, negozjanti ta’ l-ilsiera, giddieba, dawk li jaħilfu l-falz; u għal dak kollu li jmur kontra t-tagħlim sħiħ (id-duttrina tajba)” (1 Tim 1,9-10). U fit-tieni ittra Pawlu jkompli jisħaq ma’ Timotju biex iħares “it-teżor tal-fidi” li kien fdat f’idejh (ara 2 Tim 1,14)!

“Duttrina tajba” u “t-teżor tal-fidi” huma żewġ frażijiet profondi ħafna u validi mhux biss għall-Knisja tal-bidu imma wkoll għall-Knisja kontemporanja! Għax illum qegħdin ngħixu fi żminijiet fejn ilkoll kemm aħna – intom, ħuti fis-saċerdozju; intom, soċji, li għandkom il-kariżma u l-mandat f’din is-Soċjetà tad-Duttrina Kristjana; intom, reliġjużi; u intom, għeżież lajċi – qegħdin nixxenqu biex inħaddnu din id-“duttrina tajba” li għaddielna Pawlu! Jien dan nista’ ngħidu għax xi wħud minnkom stess ġieli tistaqsuni: “Imma dak li ntqal fit-tali programm huwa l-vera duttrina? Dik il-kitba tirrifletti dak li hemm fid-depożitu tal-fidi?”.

X’inhu t-tagħlim sħiħ?
X’jifhem Pawlu b’“duttrina tajba”? M’hux faċli nidħlu fil-moħħ u l-qalb ta’ l-Appostlu. Imma ċertament Pawlu jimplika li hu t-tagħlim li l-ewwel u qabel kollox irid ikun rifless fil-ħajja, it-tagħlim li jitlob koerenza bejn il-Vanġelu u l-ħajja tax-xandâr! Għalhekk Pawlu bil-kuraġġ jistieden lid-dixxiplu: “Kun ixbah lili, li nixbah lil Kristu”. Pawlu ma kellux dubju li kien qed jgħallem din id-duttrina tajba. U aħna rridu noqogħdu attenti ħalli t-tagħlim li ngħaddu jkun jirrifletti din il-koerenza bejn dak li nistqarru u dak li ngħixu, għax anki l-imġiba tagħna hija strument li bih nittrażmettu l-Vanġelu lill-oħrajn. Jien ma nistagħġibx illi jkun hemm min jitfixkel għaliex bil-kliem ngħidu mod imma mbagħad b’imġibitna ngħaddu messaġġ ieħor!

Għal San Pawl l-essenza ta’ dan it-“tagħlim sħiħ” kienet il-primat ta’ Alla u li l-grazzja ta’ Alla hija gratuwita. Alla jsawwab fuqna l-imħabba tiegħu mhux għax aħna għandna xi jedd imma għax hu ħa grazzja magħna. Il-ġustifikazzjoni sseħħ bil-fidi! L-imħabba ta’ Alla hija tant kbira li l-Missier bagħat lil Kristu ħalli jifdi lil kull bniedem, u din il-fidwa hija offerta gratuwita ħierġa mill-qalb tfur bl-imħabba ta’ l-Iben ta’ Alla lejn il-bniedem.

Din l-imħabba narawha inkarnata fi Kristu: “Hu, li kellu n-natura ta’ Alla, ma qagħadx ifittex tiegħu li huwa daqs Alla, imma xejjen lilu nnifsu billi ħa n-natura ta’ lsir, sar jixbah lill-bnedmin u deher minn barra bħall-bnedmin; ċekken lilu nnifsu billi obda sal-mewt, anzi sal-mewt tas-Salib” (Efes 2,6-8). Għal Pawlu l-umiltà ta’ Kristu hija element ta’ din id-duttrina tajba. Kristu tneżża’ minn kollox biex ilibbes lilna bid-divinità! Daqshekk hija profonda l-umiltà ta’ Alla! Jekk aħna ma nħallux din l-umiltà ssaħħarna ma nistgħux ninfetħu għall-misteru.

Din id-duttrina tajba tidher fil-mod kif wieħed jaħseb u jaġixxi, u titlob imġiba magħmula mill-umilità, is-sinċerità, id-diżinteress personali u d-disponibbiltà għall-qadi. Fil-fatt aspett ieħor ta’ dan id-depożitu tal-fidi huwa s-Salib, li permezz tiegħu dehret il-gratuwità tal-fidwa li kisbilna Kristu. Ġesù offra lilu nnifsu bħala vittma fuq is-Salib biex jagħti glorja lil Alla l-Missier u biex jifdina. Din il-verità tant hija qawwija li hemm min jitfixkel, tant li Pawlu lill-Korintin jgħidilhom li “l-predikazzjoni tas-Salib hija bluha għall-pagani u skandlu għal-Lhud, imma għal dawk li jsalvaw, għalina, hija l-qawwa ta’ Alla… Fejn hu l-għaref? Fejn hu l-iskriba? Fejn hu l-filosfu tad-dinja? U billi fl-għerf ta’ Alla d-dinja b’għerfha ma għarfitx lil Alla, Alla għoġbu jsalva lil min jemmen bil-bluha tal-predikazzjoni” (1 Kor 1,18-21).

Kieku kellna niġbru fil-qosor x’inhi din id-duttrina tajba skond San Pawl, konna niġbruha taħt dawn it-tliet elementi: l-imħabba ta’ Alla, l-umiltà ta’ Kristu u s-Salib.

Xandâr tat-tagħlim sħiħ
Il-beatu Dun Ġorġ kien konvint minn dan “it-tagħlim sħiħ”, kif jirriflettu ċerti kitbiet u talb tiegħu. Waħda mit-talbiet li ħallielna hija dik li s-soċji jgħidu fl-Arloġġ fil-ħin tal-11.15am: “Alla Missier, noffrulek il-pjagi ta’ Sidna Ġesù Kristu biex fil-Knisja tiegħek tkattar in-numru ta’ operarji tiegħek u ssaqqi kontinwament bl-ispirtu tal-karità, ta’ l-umiltà u tal-manswetudni”. F’din it-talba nara ġabra ta’ din id-duttrina tajba: l-imħabba, li hija Alla nnifsu; l-umiltà u l-manswetudni, li huma modalità kif ngħixu l-imħabba fil-prattika.

Għal Dun Ġorġ kien importanti li l-bniedem ikun mimli b’Alla u jgħix għal Alla! Alla għandu jkun oġġett ewlieni tal-ħsieb tal-bniedem.

Biex il-bniedem jagħraf lil Alla jeħtieġ li jkun umli, għax “m’hemmx Alla fejn m’hemmx umiltà” (Direttorju spiritwali 98), u min jagħraf lil Alla ma jistax ma jikbirx fl-umiltà. Kif jgħallem Dun Ġorġ is-sinjal sod tal-vera umiltà huwa l-ubbidjenza. Din il-virtù ta’ l-ubbidjenza hija sabiħa f’kulħadd, għax ilkoll hemm bżonn nagħmlu konfront mar-rieda ta’ Alla; imma l-aktar l-ubbidjenza hija meħtieġa f’dawk li Alla sejħilhom biex iwasslu “it-tagħlim sħiħ” lill-oħrajn!

Min bl-umiltà joqrob lejn Alla jikber fil-virtù tal-manswetudni u jagħraf ikun kollu kemm hu ta’ Alla u ta’ l-oħrajn. Jasal f’dan il-grad min jimita lil Ġesù, il-Ħaruf ġwejjed li joffri lilu nnifsu bħala vittma għall-oħrajn billi ma jfittixx dak li hu tiegħu, imma jkun lest li jitlef u jitbattal. Fi kliem ieħor huwa manswet dak li jaċċetta li jissallab frott imħabbtu għal Alla u għall-proxxmu.

Il-ħajja ekkleżjali llum
Din hija l-bażi tal-ħajja ekkleżjali. Kif jgħid Pawlu lil Timotju: “ma noqogħdux nintilfu fi kwistjonijiet fuq kliem li ma jiswa għal xejn ħlief biex jagħmel ħsara lil min jisimgħu” (2 Tim 2,14), imma niftakru “f’Ġesù Kristu li qam mill-imwiet” (2,8). Biex tgħix dan it-“tagħlim sħiħ” trid tkun lest biex bħal Pawlu tbati sa l-irbit tal-ktajjen bħallikieku tkun għamilt xi delitt (ara 2,9) u tieħu kollox bis-sabar għall-imħabba ta’ dawk li qed jistennew il-fidwa (ara 2,10)!

Għalhekk, għeżież tiegħi, nitolbu lill-Mulej Alla biex bl-interċessjoni ta’ Dun Ġorġ l-ewwelnett tasal din it-talba f’ġieħ il-pjagi biex il-Missier ikattar in-numru ta’ l-operaturi pastorali; ma’ dawn ninkludi mhux biss il-vokazzjonijiet saċerdotali, li l-Knisja f’pajjiżna tant għandha bżonn, imma wkoll vokazzjonijiet għall-ħajja reliġjuża u dik ikkonsagrata, u lajċi oħra li, imnebbħin mill-kariżma ta’ Dun Ġorġ, jissieħbu f’din is-Soċjetà tal-Museum, li hija monument ħaj u barka għall-Knisja u għal pajjiżna. Fl-istess ħin nitolbu lill-Missier sabiex jagħtina dan l-ispirtu ta’ l-imħabba, ta’ l-umiltà u tal-manswetudni biex inkunu nistgħu nħaddnu u ngħixu din id-duttrina tajba.

Monument f’Għawdex
Din il-ġrajja tiġi u tgħaddi. Fid-djoċesi ta’ Għawdex nixtiequ nagħmlu tifkira ta’ Dun Ġorġ u għalhekk qed inniedu monument ta’ Dun Ġorġ bil-ħsieb li nqiegħduh f’post ċentrali li hemm fil-faċċata tal-knisja ta’ San Ġakbu. Imma l-aqwa monument li nistgħu nagħmlu lill-beatu Dun Ġorġ la huwa fil-bronż u lanqas fl-irħam, imma billi nitħeġġu iktar mill-eżempju tiegħu ħalli nikkontribwixxu biex inkomplu nibnu l-Knisja ta’ Kristu f’pajjiżna. Din nibnuha fis-sod jekk aħna nibqgħu nxandru din id-duttrina sħiħa li għallimna Pawlu fuq Ġesù Kristu.