Illejla, fil-Knisja Katidrali ta’ Għawdex, Mons. Isqof Mario Grech se jordna lid-Djakni Michael Grima (San Lawrenz) u Carl Scerri (Rabat - Katidral) bħala Presbiteri. Il-quddiesa tibda fis-6.30pm.
Fil-festa tal-qaddis saċerdot Filippu Neri, nawgurawlhom li anke l-qalb tagħhom tiġi għal dejjem mimlija bl-Ispirtu s-Santu.
Ad multos annos.
Il-Fergħa Nisa tal-Azzjoni Kattolika f’Għawdex għandha pjaċir tistieden lin-Nisa kollha ta’ kull età u stat (xebbiet, miżżewġin, ommijiet, nanniet, studenti, professjonisti, attivi fl-appostolat, reliġjużi…) ħaċ-ċelebrazzjoni tal-JUM DINJI TA’ TALB MIN-NISA KATTOLĊI (WUCWO Day), har it-Tlieta 23 ta’ Mejju (9 am - 10.45) fis-Sala tad-Dar Ċentrali tal-Azzjoni Kattolika Triq Sir Arturo Mercieca, Victoria).
Ejja itlob u rrifletti magħna - u ma’ tant eluf f’tant pajjiżi!
Quddiesa mill-Assistent Ekklesjastiku Djoċesan il-Kan. Noel Saliba, li jkompli jmexxi Diskussjoni dwar problemi u diffikultajiet li jiltaqgħu magħhom in-nisa fostna u madwar id-dinja.
Id-Djoċesi ta’ Għawdex bil-ferħ tagħti l-aħbar li nhar il-Ġimgħa, 26 ta’ Mejju, se ssir l-Ordinazzjoni Presbiterali tar-Rev.di Djakni Michael Grima u Carl Scerri, filwaqt li fil-15 ta’ Ġunju se ssir l-Ordinazzjoni Djakonali tas-Seminarista Joseph Hili.
Bi tħejjija għal dawn iċ-ċelebrazzjonijiet, is-Seminarju ta’ Għawdex jistieden lill-familjari, lill-ħbieb u lill-Komunità Nisranija f’Għawdex biex tissieħeb f’Velja ta’ Talb li se ssir fis-Seminarju nhar il-Ħamis 25 ta’ Mejju, fit-8.00pm.
ITTRA PASTORALI
MILL E.T. MONS. CHARLES J. SCICLUNA
Arċisqof ta’ Malta
u
MILL E.T. MONS. MARIO GRECH
Isqof ta’ Għawdex
ELEZZJONI ĠENERALI 2017
NERFGĦU R RESPONSABBILTÀ TAGĦNA
Għeżież ħutna,
L-Elezzjoni Ġenerali hi ġrajja importanti ħafna fil-ħajja tas-soċjetà Maltija.Se nagħżlu lil min se nafdaw it-tmexxija ta’ pajjiżna fis-snin li ġejjin.
Din hi responsabbiltà serja fuq spallejna li titlob minna li nippreparaw ruħna sew ħalli nagħmlu deċiżjoni infurmata.
Hi responsabbiltà li titlob minna li nivvutaw skont il-kuxjenza, li tfisser li quddiem Alla nagħrfu dak li hu veru u xieraq, u nagħżlu dak li hu tassew għall-ġid komuni u għal soċjetà ġusta. Il vot tagħna hu tweġiba għad domanda: x’tip ta’ soċjetà rridu għalina lkoll u għall-ġenerazzjonijiet futuri?
Hi responsabbiltà li titlob minna li nagħżlu persuni ta’ għaqal u integrità, li jgħożżu u jħaddnu l-valuri etiċi li nemmnu fihom. Ewlieni fosthom hu l-valur tal-ħarsien tal-ħajja umana mill-ewwel mument tat-tnissil tagħha sat-tmiem naturali tagħha, u tar-rispett lejn id-dinjità ta’ kull bniedem.
Inħeġġu lil kulħadd biex naqdu dmirna b’responsabbiltà, u nitolbu d-dawl u l-għajnuna tal-Ispirtu s-Santu ħalli nagħmlu d-deciżjoni t-tajba.
Nitolbu biex fi kliemna u għemilna nkunu mmexxija dejjem bi spirtu ta’ djalogu, ta’ rispett kbir lejn il-verità u lejn xulxin, ukoll lejn min jaħsibha differenti minna.
Nagħtukom il-barka pastorali tagħna.
Maħruġa llum, 9 ta’ Mejju 2017, festa ta’ San Ġorġ Preca.
✠ Charles J. Scicluna ✠ Mario Grech
Arċisqof ta’ Malta Isqof ta’ Għawdex
Ara format pdf: 38-ittra-pastorali-elezzjoni-generali-2017-mt.pdf
English pdf version: 38-pastoral-letter-general-election-2017-en.pdf
