Archive for September, 2015

Titħabbar il-mewt tal-Kanonku Dun Franġisk Vella

Published on September 11, 2015 in Press Releases.

vella-francis.jpgDalgħodu tħabbret il-mewt tal-Kanonku Dun Franġisk M. Vella, mill-parroċċa ta’ San Ġorġ, ir-Rabat, Għawdex. Dun Franġisk kellu 85 sena. Hu miet l-Isptar Ġenerali ta’ Għawdex, fejn għal dawn l-aħħar jiem kien jinsab għall-kura.

Dun Franġisk twieled fid-29 ta’ Settembru 1929. Ġie ordnat saċerdot fid-9 ta’ Mejju 1955.  Dun Franġisk studja fl-universitajiet pontifiċji tal-Gregorjana u tal-Lateran, fejn iggradwa fit-Teoloġija u fil-Liġi tal-Knisja. Hu qatta’ l-parti l-kbir tal-ministeru saċerdotali tiegħu fl-Istati Uniti, kemm f’servizz pastorali fil-parroċċi kif ukoll fil-Veteran Affairs Medical Centre (VAMC).

Il-funeral tal-Kanonku Franġisk Vella se jsir nhar it-Tnejn li ġej, 14 ta’ Settembru,fil-Bażilika ta’ San Ġorġ.Fit-3.00pm, il-fdalijiet tal-Kanonku Vella jkunu esposti għall-qima fil-knisja ta’ San Ġakbu; fl-4.15pm is-saċerdoti jmexxu t-talba tal-Għasar, mnejn imbagħad jitlaq korteo għall-Bażilika ta’ San Ġorġ, fejn il-Vigarju Ġenerali, Mons. Tarcisio Camilleri jmexxi konċelebrazzjoni fil-5.00pm.

Filwaqt li nagħtu l-għomor lill-familjari ta’ Dun Ġużepp, nitolbu lil Alla, Missier il-Ħniena, biex jilqgħu fil-ferħ tal-Ġenna.

RIP

Ara wkoll: http://www.stgeorge.org.mt/news_details.asp?NewsID=2312

Ospitalità lir-Refuġjati

Published on September 7, 2015 in Press Releases.

UFFIĊĊJU STAMPA KURJA VESKOVILI TA’ GĦAWDEX
Stqarrija għall-Istampa
6 ta’ Settembru 2015

NAGĦTU OSPITALITÀ LIR-REFUĠJATI

A migrant holds up a sign in front of the Keleti railway station in Budapest, Hungary, on Friday.Fid-dawl tal-Ġublew tal-Ħniena li l-Knisja qed titħejja għalih u jiftaħ f’Diċembru li ġej, il-Papa Franġisku, wara l-Angelus ta’ dalgħodu fi Pjazza San Pietru, għadu kemm għamel din il-proposta:

“Nagħmel appell lill-parroċċi, lill-komunitajiet reliġjużi, lill-monasteri u lis-santwarji tal-Ewropa kollha biex jesprimu l-konkretezza tal-Vanġelu u jilqgħu għandhom familja ta’ refuġjati.  Ġest konkret bi tħejjija għas-Sena Mqaddsa tal-Ħniena.

Kull parroċċa, kull komunità reliġjuża, kull monasteru, kull santwarju fl-Ewropa għandhom jospitaw familja, ibda mid-Djoċesi tiegħi ta’ Ruma.

Indur fuq ħuti l-Isqfijiet tal-Ewropa, tabilħaqq ragħajja, biex fid-djoċesijiet tagħhom jagħtu widen għal dan l-appell tiegħi, huma u jiftakru li l-Ħniena hi t-tieni isem tal-Imħabba: ‘Kulma għamiltu ma’ wieħed mill-iżgħar fost dawn ħuti, għamiltuh miegħi’ (Mt 25:40).

Fid-dawl ta’ din is-sejħa ċara tal-Qdusija Tiegħu l-Papa, id-Djoċesi ta’ Għawdex tixtieq tfakkar fl-appell li kien għamel sena ilu l-Isqof Mario Grech fil-Festa ta’ Marija Bambina: Continue reading >>

Ordinazzjoni Episkopali ta’ Patri George Bugeja O.F.M.

Published on September 5, 2015 in Press Releases.

Ilbieraħ filgħaxija, il-Ġimgħa 4 ta Settembru, fis-Santwarju Nazzjonali tal-Madonna Ta’ Pinu, Għawdex, l-Isqof ta’ Għawdex Mons. Mario Grech mexxa l-Konsagrazzjoni Episkopali ta’ Mons. George Bugeja ofm, Isqof Koadjutur ġdid tal-Vigarjat Appostoliku ta’ Tripli, fil-Libja.

Fi tmiem il-Quddiesa, l-Isqof Grech ħabbar li l-ġabra li saret fid-Djoċesi ta’ Għawdex fl-aħħar jiem biex l-Isqof George juża għall-karità fil-Knisja fi Tripli ġa laħqet is-somma sabiħa ta’ €14,000.

Ara r-ritratti tal-mumenti l-aktar sinifikattivi tal-ordinazzjoni: Continue reading >>

IL-VJOLENZA TAL-IMĦABBA

Published on September 5, 2015 in Homilies.

Omelija fil-Konsagrazzjoni Episkopali ta’ Mons. George Bugeja OFM
Santwarju Nazzjonali tal-Madonna Ta’ Pinu, Għawdex
Il-Ġimgħa 4 ta’ Settembru 2015
L-E.T. Mons. Mario Grech, Isqof ta’ Għawdex

p1014332.JPG

Fil-Vanġelu għadna kemm smajna lil Ġesù jgħanni lill-imħabba tal-Missier – kif ħabbni l-Missier! (Ġw 15:9).  Hekk jien illum inħoss li f’isem il-Knisja, partikularment f’isem il-Knisja f’Għawdex, nixtieq ngħanni lil din l-imħabba ta’ Alla.  Għax fl-għażla tiegħek għall-ministeru ta’ isqof, għażiż Patri George, jien nara tilma l-imħabba ta’ Alla għall-Knisja universali, għall-Knisja fi Tripli (Knisja missjunarja), għall-Ordni Franġiskan, imma b’mod speċjali għall-Knisja f’din il-gżira, ċkejkna fid-daqs imma kbira fil-qalb.  Continue reading >>

Notifika mill-Ufficcju Kleru

Published on September 3, 2015 in Press Releases.

Notifika tal-UFFIĊĊJU KLERU

Djoċesi ta’ Għawdex

 

 

B’deċiżjoni tas-Santa Sede, Dumink Camilleri kien dimess mill-istat klerikali.

Dikjarazzjoni tal-Isqfijiet ta’ Malta u Għawdex

Published on September 3, 2015 in Press Releases.

Uffiċċju Komunikazzjoni
Arċidjoċesi ta’ Malta

3 ta’ Settembru 2015
95/2015

DIKJARAZZJONI KONĠUNTA MILL-ISQFIJIET TAD-DJOĊESIJIET TA’ MALTA U GĦAWDEX, MONS. CHARLES J. SCICLUNA U MONS. MARIO GRECH

L-Isqfijet jixtiequ jagħtu assikurazzjoni lill-pubbliku li l-ħarsien tal-minuri huwa dejjem fost il-miri prinċipali tad-Djoċesijiet immexxija minnhom, u li l-liġijiet, kemm tal-Knisja kif ukoll tal-Istat, huma dejjem osservati u esegwiti f’din il-materja bħal f’kull materja oħra.

Kif inhu magħruf, fil-ħarifa tas-sena 2014 l-Isqfijiet flimkien mas-Superjuri Maġġuri Reliġjuzi ta’ Malta u ta’ Għawdex adottaw u ppubblikaw il-policy il-ġdida dwar kif jiġu mistħarrġa allegazzjonijiet ta’ abbuż ta’ minuri minn membri tal-kleru u reliġjużi u minn funzjonarji pastorali oħra. Fil-bidu ta’ din is-sena, l-istess awtoritajiet ekkleżjastiċi nnominaw grupp ta’ esperti biex jiffurmaw il-Kummissjoni għall-Ħarsien tat-Tfal u l-Adulti Vulnerabbli (imsejħa wkoll Safeguarding Commission) immexxija mill-Head of Safeguarding, is-Sur Andrew Azzopardi.  Din il-Kummissjoni ilha taħdem minn Frar ta’ din is-sena.

Skont din il-policy u l-liġi tal-Knisja, meta ssir allegazzjoni ta’ abbuż fuq minuri minn saċerdot, l-Isqof immedjatament jillimita jew jissospendi l-ministeru pastorali tas-saċerdot biex dan ma jkollux iżjed kuntatt ma’ minuri, u jirreferi l-każ lis-Safeguarding Commission għall-investigazzjonijiet meħtieġa. Il-liġi ċivili li tkun applikabbli tiġi wkoll osservata. Jekk fi tmiem il-proċess, skont il-liġi tal-Knisja l-akkuża tigi ppruvata, is-saċerdot jingħata l-piena applikabbli.  Din il-piena tista’ tkun ta’ restrizzjoni permanenti tal-ministeru saċerdotali jew dimissjoni (jiġifieri tneħħija mill-istat klerikali).

L-Isqfijiet jaqblu li b’effett immedjat kull deċizjoni definittiva li biha jkun hemm restrizzjoni permanenti tal-ministeru saċerdotali jew tneħħija mill-istat klerikali, il-pubbliku jiġi mgħarraf permezz tal-websites tad-Djoċesijiet – www.maltadiocese.org u www.gozodiocese.org.

Din hija b’żieda mal-prassi diġà mħaddma s’issa li deċiżjonijiet bħal dawn jiġu mgħarrfa bihom il-kappillan tal-parroċċa fejn is-saċerdot ikun qed jgħix. Dawn is-saċerdoti jinqatgħu ukoll mil-lista uffiċjali tal-kleru.

+  Charles J. Scicluna                    + Mario Grech
Arċisqof ta’ Malta                          Isqof ta’ Għawdex