Talb għall-paċi u l-Insara ppresegwitati fil-Velja tal-Għid tal-Assunta f’Għawdex
Għal sena oħra, is-Santwarju Nazzjonali Ta’ Pinu f’Għawdex sa jorganizza l-Velja Djoċesana tal-Għid ta’ l-Assunta, lejlet is-solennità tat-Tlugħ fis-Sema tal-Verġni Marija, nhar il-Ħamis li ġej, 14 ta’ Awwissu 2014.
Il-Velja, li tinżamm fuq iz-zuntier spazjuż ta’ quddiem dan is-santwarju Marjan, tibda b’ċelebrazzjoni ta’ kant u salmi fit-8.00pm, u tkompli bil-Quddiesa tal-Vġili mmexxija mill-E.T. Mons. Mario Grech, Isqof ta’ Għawdex.
Wara l-Quddiesa, fl-10.15pm, jiftaħ lejl ta’ Adorazzjoni Ewkaristika fis-Santwarju. F’nofsillejl ikun hemm Quddiesa oħra.
Iċ-ċelebrazzjoni tixxandar diretta fuq Radju Marija 102.3 FM, li sa jorganizza wkoll trasport għal dawk il-pellegrini li jixtiequ jaqsmu minn Malta (t. 21453105). Jiġi organizzat ukoll trasport mill-parroċċi Għawdxin.
Il-Velja din is-sena qed issir b’talb speċjali għall-paċi fid-dinja u għall-Insara ħutna ppresegwitati f’reġjuni bħas-Sirja, l-Iraq u l-Art Imqaddsa.
Fl-okkażjoni tas-Solennità ta’ Marija Mtellgħa s-Sema, l-Isqof Mario Grech ħareġ Ittra Pastorali dwar il-viżjoni tal-Knisja dwar is-sesswalità umana.
L-IMĦABBA SABIĦA
(Il-Vanġelu tas-Sesswalità)
1. Fil-fond tal-qalb ta’ kull bniedem hemm ix-xewqa għall-hena. Ma ssibx bniedem li ma jridx ikun kuntent, tant li Pascal jinnota li anki min itemm ħajtu b’idejh, jagħmel dan il-pass ikrah għax ikun konvint li ser ikun aħjar milli jkun. Imma huwa fatt li għalkemm ix-xewqa biex inkunu sewwa u henjin hija komuni għal kulħadd, mhux kulħadd ifittex il-kuntentizza bl-istess mod. It-toroq li nagħżlu biex inkunu ferħanin mhux biss huma varji, imma xi drabi huma wkoll kuntrarji għal xulxin. Dan jispjega għaliex fid-dinja hawn min hu kuntent u hawn min mhux.
Kompli aqra minn hawn: 38-2014-pastorali-santa-marija-2014.pdf
Niżżel il-verżjoni mqassra tal-Ittra Pastorali: 38-2014-pastorali-santa-marija-2014-verzjoni-qasira.pdf
Download a short version of Bishop Grech’s Pastoral Letter in English: pastoral-letter-aug2014.pdf
L-Isqfijiet Maltin bagħtu Messaġġ fejn jistiednu lill-Insara jitolbu għall-paċi u għall-Insara ppersegwitati, speċjalmenti l-Insara fl-Iraq, li bħalissa għaddejjin minn persekuzzjoni ħarxa.
B’solidarjetà ma’ ħutna l-Insara fl-Iraq, l-Isqfijiet qed jappellaw biex l-Insara f’pajjiżna jagħtu donazzjonijiet ta’ flus biex jintbagħtu lill-komunitajiet Insara fl-Iraq. Min jixtieq jaghmel xi offerta, jgħaddiha lill-Kappillan tal-Parroċċa jew Rettur tal-Knisja.
Niżżel il-Messaġġ tal-Isqfijiet minn hawn:
78-messagg-tal-isqfijiet-mlt.pdf
Niżżel kopja tal-Bullettin minn hawn:
Programm:
SEMINAR GĦAL DAWK LI JANIMAW
IL-ĦIDMA PASTORALI FL-ISKEJJEL SEKONDARJI U POST SEKONDARJI F’GĦAWDEX
8 TA’ AWWISSU 2014
SEMINARJU TAL-QALB TA’ ĠESÙ
GĦAWDEX
09:00am Merħba u daħla għas-seminar (dun Joseph Bajada)
09:15am Preżentazzjoni tal-membri tal-pt (membri kollha)
09:30am Animazzjoni Nisranija fl-Iskola (dun Michael Said)
10:00am Mistoqsijiet
10:15am Pawsa kafè/tè
10:45am Preżentazzjoni tal-ħidma f’kull skola (rappreżentanti pt)
11:30am Preżentazzjoni tal-Prayerspacesinschool (dun Joseph Bajada, rapp. Konservatorju, rapp. Seminarju Min.)
12:00pm Konklużjoni ( E.T. Mons M. Grech)
Published on August 5, 2014
in Homilies.
Omelija fil-Ftuħ tal-Proċess Djoċesan
fil-Kawża tal-Beatifikazzjoni u Kanonizzazzjoni
tal-Qaddej ta’ Alla Mikiel Attard
Santwarju Madonna Ta’ Pinu, l-Għarb, Għawdex
Is-Sibt 2 ta’ Awwissu 2014
L-E.T. Mons. Mario Grech, Isqof ta’ Għawdex
SAĊERDOT TAN-NIES
Il-vanġelu li tħabbrilna (Mt 14:13-21) ma jistax iħallina indifferenti meta naraw lil Kristu jċarrat beraħ il-qalb ħanina ta’ Alla. F’dan ir-rakkont nara lill-Mulej Ġesù jkellimna dwar il-ġewwieni mqanqal mill-ħniena ta’ Alla l-Missier lejn il-bniedem illi riesaq il-lejl fuqu – allura lejk u lejja, li ħafna drabi naraw id-dlam jirbaħ fuq id-dawl.
Ġesù jurina li l-vixxri ta’ Alla jitqanqlu meta jara lili u lilek bil-ġuħ, bħalma kienet dik il-folla li jsemmi San Mattew. Dun Mikiel kien jgħid li l-bniedem mhux biss għandu l-ġuħ tal-istonku, imma għandu l-ġuħ tal-moħħ, tar-ruħ u tal-kuxjenza; imma mbagħad kien iżid: “Alla waħdu kapaċi jtaffi dan il-ġuħ”.
Fil-Vanġelu, Ġesù jgħidilna li Alla jitħassarna meta jarana milquta mill-mard. Jekk hawn xi ħadd fostna li mhux marid, iqum bilwieqfa, u jien noqgħod bilqiegħda! Qed ngħid għal kull xorta ta’ mard li kapaċi jaqtgħalna n-nifs fil-ħajja. Alla ta’ Ġesù Kristu jitħassarna u jfejjaqna. Continue reading >>
Published on August 5, 2014
in Homilies.
IL-QIES – REGOLA TAD-DEHEB
Sintesi tal-Omelija tal-E.T. Mons. Mario Grech, Isqof ta’ Għawdex,
fil-Festa ta’ San Ġużepp, fil-Knisja Arċipretali tal-Qala, il-Ħadd 3 ta’ Awwissu 2014
Il-moderazzjoni hija regola tad-deheb li tgħinna norganizzaw aħjar il-passjonijiet li hemm fina. Meta tkun ikkontrollata, din l-enerġija tibni l-persuna, imma f’każ kuntrarju tista’ tkun il-qerda tal-individwu. Il-virtù li tagħti din is-setgħa lill-bniedem tissejjaħ “temperanza”, moderazzjoni jew qies.
Is-sobrjetà, li fis-soċjal hemm min isejħilha awsterità, mhix riċetta politika biex is-soċjetà tegħleb il-kriżi ekonomika u lanqas ma hija xi triq biex noħorġu mit-tunnel tal-konsumiżmu; imma hija virtù li twitti t-triq biex il-bniedem ikun hieni.
Din il-virtù neħtiġuha bħall-ħobż, għax hemm ir-riskju li nesaġeraw f’kollox, anki fl-istess ħeġġa biex inkunu persuni ta’ virtù. Fil-fatt, kif jikteb Orazju, “let the wise man bear the name of fool, and the just of unjust, if he pursues virtue itself beyond the proper bounds”. Fil-fatt, meta nesaġeraw fil-manifestazzjonijiet reliġjużi tagħna, aħna nkunu ntebbgħu l-virtù tar-reliġjon! Fil-kamp tal-liġi, hemm l-assjoma “extreme law, extreme injury”. Continue reading >>
Stqarrija għall-Istampa
Ftuħ tal-Proċess Djoċesan tal-Beatifikazzjoni u l-Kanonizzazzjoni tal-Qaddej ta’ Alla Dun Mikiel Attard
Nhar is-Sibt 2 ta’ Awwissu 2014, fis-Santwarju tal-Madonna Ta’ Pinu f’Għawdex, fis-6.30pm, kienet iċċelebrata s-sessjoni pubblika tal-ftuħ tal-Proċess Djoċesan tal-Beatifikazzjoni u l-Kanonizzazzjoni tal-Qaddej ta’ Alla Dun Mikiel Attard. Din saret waqt Konċelebrazzjoni Solenni mmexxija mill-Isqof ta’ Għawdex Mons. Mario Grech flimkien ma’ għadd sabiħ ta’ saċerdoti u reliġjużi konċelebranti, kif ukoll għadd kbir ta’ fidili lajċi. Continue reading >>
