Niżżel kopja tal-Bullettin minn hawn:
Archive for June, 2014
Waqt li llum, Solennità tal-Qalb ta’ Gesù, kl-Knisja tfakkar il-Jum Dinji ta’ Talb għall-Qdusija tas-Saċerdoti, b’niket inħabbru li lbierah wara nofsinhar miet Mons. Ġużeppi Azzopardi, saċerdot minn ta’ Kerċem. Dun Ġużepp kellu 88 sena u kien ordnat saċerdot fid-29 ta’ Marzu 1952.
Il-funeral tiegħu se jsir għada s-Sibt, 28 ta’ Ġunju. Fit-3.30pm jitlaq il-korteo mill-Isptar Ġenerali għall-Knisja Parrokkjali ta’ Kerċem; fl-3.45pm tingħad it-talba tal-Għasar; fl-4.00pm quddiesa.
Ningħaqdu mal-familjari tiegħu f’dan il-mument u nitolbu lil Alla l-Missier iferra’ fuqu l-imħabba kollha ħniena tal-Qalb Divina ta’ Ibnu Ġesù.
RIP
Niżżel kopja tan-Newsheet minn hawn:
Omelija fil-Festa tas-Sejħa tal-Verġni Mqaddsa Ta’ Pinu
Santwarju Nazzjonali Ta’ Pinu, l-Għarb, Għawdex
Il-Ħadd 22 ta’ Ġunju 2014
L-E.T. Mons. Mario Grech, Isqof ta’ Għawdex
NAĦDMU GĦAL KULTURA LI TGĦOŻŻ IL-GRATWITÀ
Jiġini li nistaqsi jekk Ġesù u Marija kinux kuntenti meta kienu mistiedna għat-tieġ ta’ Kana. Għax illum ġieli jiġri li meta jasal invit ta’ tieġ, hemm min iqarras wiċċu għax invit ġdid ifisser li trid tagħti rigal. Sfortunatament illum qed nitilfu l-ispirtu ta’ gratwità u għalhekk mhux faċli nemmnu li koppja tistedinna għax għandha pjaċir isseħibna fil-ferħ tagħha; bħal donnu lanqas nistgħu nifhmuha li l-bniedem minn rajh jista’ jagħti rigal bħala epressjoni tar-rieda tiegħu li jieħu sehem fil-ferħ tal-oħrajn. Il-kultura tad-drittijiet, fejn kulħadd jistenna kollox b’jedd, qed tnessina li fil-ħajja hemm ħafna affarijiet li nirċevuhom gratwitament – sempliċement għax min jagħtihomlna, iħobbna u ma jistenna xejn lura – u li aħna ħielsa li nagħtu mingħajr ma nistennew xejn lura. Ġejna mirkubin mill-mentalità li ħadd ma jagħmel xejn għal xejn għaliex kollox għandu prezz.
Il-miraklu tal-ilma mibdul fi nbid li Ġesù għamel f’Kana huwa espressjoni qawwija ta’ din il-gratwità. Ġesù u Marija ħadu din l-inizjattiva minn rajhom. Ma kellhom ebda obbligu li jagħmlu dan l-intervent straordinarju. Min-naħa tagħhom l-għarajjes mhux biss ma kinux qed jistennew dan il-miraklu, imma lanqas biss kienu jafu min fejn kien wasal dak l-inbid tajjeb. Il-gratwità hija fin-natura ta’ Alla. Propju għax Alla huwa mħabba, huwa kontinwament jingħata lill-bnedmin mingħajr ma jistenna xejn lura. Kif jikteb San Ġwann, “hawn qiegħda l-imħabba: mhux għax aħna ħabbejna lil Alla, imma għax ħabbna hu u bagħat lil Ibnu biex ikun ta’ tpattija għal dnubietna” (1 Ġw 4:9). Continue reading >>
Niġġieldu l-faqar
Omelija tal-Isqof Mario Grech
Festa ta’ Sant’ Antnin ta’ Padova
Knisja ta’ San Franġisk, Ir-Rabat, Għawdex – Il-Ġimgħa 13 ta’ Ġunju 2014
Għalliem tat-teoloġija kontemporanju għal Sant’Antnin ta’ Padova kiteb li qatt ma kien sema’ b’konsulatur ħelu tal-foqra bħal Sant’Antnin u anqas b’kontestatur qalil tas-sinjuri bħalma kien Sant’Antnin. Min hu devot ta’ Sant’Antnin ma jistax ma jimitahx fl-attenzjoni li kellu biex jisma’ l-karba tal-foqra.
L-għotjiet ta’ karità huma wieħed mill-modi kif wieħed jgħin biex negħlbu l-faqar. Huwa ppruvat li pajjiżna huwa minn ta’ quddiem nett fil-lista ta’ dawk il-pajjiżi fejn iċ-ċittadini personalment jagħmlu donazzjonijiet ġenerużi ħafna. Is-suċċess ta’ għadd ta’ kampanji li jsiru f’pajjiżna għal skopijiet ta’ karità jitkellem għalih waħdu. Ma għandix kliem biex infisser l-apprezzament tiegħi għal dan. Continue reading >>
Omelija fil-Velja Djoċesana ta’ Għid il-Ħamsin
Rotunda ta’ San Ġwann Battista, ix-Xewkija
Is-Sibt 7 ta’ Ġunju 2014
L-E.T. Mons. Mario Grech, Isqof ta’ Għawdex
IN-NIXFA TISTA’ TINTREBAĦ
In-nixfa hija kerha ħafna. Jekk jonqos il-ġmiel madwarna meta l-art tinxef, kemm aktar toktor il-kruha meta l-bniedem jinxef minn ġewwa!
Kulma jmur, il-qalb tal-bniedem qiegħda tinxef. Qalb xierfa u magħkusa ma tafx tħobb. Huwa fatt li llum huma diversi dawk ir-relazzjonijiet umani li qed isofru qatigħ minħabba din in-nixfa.
Qiegħed jinxef il-moħħ tagħna, fis-sens li għandna min qed jiftaqar fil-ħsieb. Hemm min qed jitgħażżen jaħseb u għalhekk jippreferi jagħmel bħax-xadini u jikkopja lil ħaddieħor. Agħar minn hekk, il-menti nixfu minħabba dik li l-Papa Franġisku jsejjaħ “id-dittatura tal-ħsieb uniku”, fis-sens li fis-soċjetà hemm ħsieb qawwi u dominanti li ma jippermettix li xi ħadd ieħor jaħseb b’mod differenti. Imbagħad hemm min jaġixxi mingħajr ħsieb. Continue reading >>
Messaġġ fl-okkażjoni tal-Konferenza Djoċesana dwar il-Mara
Azzjoni Kattolika ta’ Għawdex
Il-Ġimgħa 6 ta’ Ġunju 2014
Filwaqt li nifraħ lill-Azzjoni Kattolika (Għawdex) għal din il-Konferenza dwar Il-mara fis-soċjetà li qed issir illum, insellem lill-parteċipanti.
Is-suġġett li sejrin tiddiskutu dwaru, Qalb tħabbat fis-soċjetà, huwa tassew attwali, għaliex l-esperjenza tixhed li fejn il-mara offriet is-sehem speċifiku tagħha fil-familja, fis-soċjetà u fil-Knisja, kien hemm akkwisti kbar. Mingħajr dubju, propju bil-qawwa affettiva tagħha l-mara tagħmel differenza fil-ħajja ta’ ħafna. Fil-fatt ma tridx wisq biex tintebaħ bin-nuqqas tal-preżenza diretta jew indiretta tal-mara fil-ħajja tal-bniedem: normalment meta l-ġenju femminili huwa assenti, peress li tkun qed tiġi ttraskurata dimensjoni importanti fil-ħajja tagħna l-bnedmin, jaf ikun hemm diżordni sħiħ – ma jkunx hemm biss taħwid materjali imma wkoll emozzjonali, affettiv u spiritwali.
Minħabba dan il-vojt emozzjonali, affettiv u spiritwali, jitħarbtu wkoll ir-relazzjonijiet ta’ bejnietna. U meta r-relazzjonijiet interpersonali jiftaqru, tant jaqa’ dlam fuq għajnejna u l-ħajja ssir tqila, li kollox jorħos, anki l-istess ħajja umana.
Għalhekk inħeġġiġkom biex tkunu promuturi tal-ħajja. Iżżommux lura milli tħallu lil qalbkom tmexxikom, biex meta jkun il-waqt tlissnu kelma jew tieħdu azzjoni ħalli twaqqfu mill-ġdid dak l-ordni emozzjonali, affettiv u spiritwali li jkun ixxellef. Hekk tkunu tagħtu sehemkom biex il-ħajja tkun rispettata u dawk ir-relazzjonijiet miksura jerġgħu jitwaqqfu.
Bl-interċessjoni tal-Madonna, nitlob il-barka ta’ Alla fuqkom u l-familji tagħkom.
Illum, 6 ta’ Ġunju 2014.
+ Mario Grech
Isqof ta’Għawdex
