[1]

Nhar il-Ġimgħa 23 ta’ Mejju 2014, Sister Lux Marie Grech (Elizabeth Grech) tfajla ta’ 26 sena mill-Parroċċa tan-Nadur għamlet il-professjoni sempliċi fi ħdan il-Missjunarji tal-Karità magħrufin aħjar bħala s-sorijiet ta’ Mother Theresa. Wara mixja ta’ snin ta’ formazzjoni ġewwa Ruma hi waslet li tagħmel dan il-pass bil-ferħ kollu. Minn barra jidher pass ta’ ċaħda, imma kif seta’ jixhed min kien preżenti, il-qalb kienet tfur bil-ferħ. Issa Sister Lux Marie terġa’ ġġedded il-voti temporanji għal diversi snin sakemm, jekk Alla jrid, tasal biex tagħmel il-voti perpetwi.

Il-funzjoni saret f’Ruma, fil-Knisja ta’ Sant Alfons fejn tinsab l-ikona tal-Madonna tas-Sokkors Perpetwu. Għal din iċ-ċelebrazzjoni kien hemm preżenti numru sabiħ ta’ Għawdxin u Maltin, fosthom familjari u ħbieb. Iċ-ċelebrazzjoni kienet immexxija mill-Arċisqof Konrad Krajewski (elimożinier tal-Papa) responsabbli mill-attività karitattiva tal-Papa. Wara l-omelija, is-Superjura laqgħet il-professjoni ta’ Sister Lux Marie u sħabha.

Wara ċ-ċelebrazzjoni saret festa sempliċi ħafna imma ħelwa fid-dar ta’ formazzjoni fuq il-Via Casilina. Hekk kif waslu, is-sisters daħlu ħdejn  Ġesù sagramentat u ftit wara ħarġu fost ċapċip u ferħ isellmu lill-familjari u ħbieb preżenti. Kien mument vera kommoventi. Ftit tal-ħin wara, Sister Lux Marie ingħatat l-aħbar li fix-xhur li ġejjin se tkun mibgħuta taħdem bħala missjunarja fl-Etjopja.