Maltese PDF Version
English PDF Version
ITTRA
PASTORALI
MILL-E.T. MONS. PAWL CREMONA O.P.
Arċisqof ta’ Malta
u
MILL-E.T. MONS. MARIO GRECH
Isqof ta’ Għawdex
Randan 2011
IL-LOĠIKA TA’ ALLA - IL-LOĠIKA TA’ KRISTU
Ħuti,
Fir-Randan il-Komunità Nisranija tagħmel riflessjoni dwar ir-Rieda ta’ Alla l-Missier u kif Sidna Ġesù Kristu wettaqha sal-mewt fuq is-salib. Hija stedina għalina biex aħna wkoll inwettqu dan fl-aspetti kollha tar-Rieda ta’ Alla fuqna.
Il-Mulej għandu modi differenti kif jiftħilna għajnejna dwar aspetti differenti tal-Pjan ta’ Alla.
Din is-sena l-Mulej fetħilna għajnejna fuq xi ħaġa li kienet hemm, iżda ħassejna lilna nfusna qisna bla qawwa quddiemha. Ma konniex qegħdin nindunaw biżżejjed li, fis-soċjetà ta’ madwarna, il-kultura dwar iż-żwieġ u l-familja nbidlet. Konna ngergru għaliex ‘m’għadniex bħal qabel’ u nirrassenjaw ruħna għal dan.
Din is-sena, id-diskussjoni dwar id-divorzju fetħitilna għajnejna mhux biss dwar dan il-mod kif jitħassar żwieġ dejjiemi, iżda għenitna nagħmlu l-mistoqsija dwar din il-kultura. Forsi lanqas konna ndunajna biżżejjed kemm din inbidlet, u allura, kemm ħafna drabi tkun ta’ tfixkil għal dawk li jkunu jixtiequ jiżżewġu u jipperseveraw fiż-żwieġ.
Continue reading >>
Ċirkulari 16/2011
Ittra Ċirkulari tal-E.T. Mons. Mario Grech
Isqof ta’ Għawdex
Marzu – ix-xahar ta’ San Ġużepp
Is-solennità ta’ San Ġuzepp, li ta’ kull sena niċċelebraw fid-19 ta’ Marzu, tagħti kulur Ġuzeppin lix-xahar kollu ta’ Marzu. Din id-devozzjoni, għalkemm għandha aktar minn mitejn sena, għad fadlilha l-attwalità tagħha.
Kien Giuseppe Marconi li fl-1801 ippubblika f’Ruma ktejjeb dwar ix-xahar ta’ Marzu bħala xahar iddedikat lill-Patrijarka San Ġużepp. Imbagħad, fl-1865 il-Papa Piju IX ħeġġeġ biex l-Insara jgħożżu din id-devozzjoni bħala mezz biex jitolbu lil San Ġużepp u għajnuna biex jimitaw il-virtujiet tiegħu. Il-Papa Benedittu XV, bil-motu propju Bonum sane, eżorta lill-isqfijiet biex jaraw li fid-djocesi tagħhom dan ix-xahar Ġużeppin ikun magħruf biex l-Insara jikbru fl-imħabba tagħhom lejn San Ġużepp, ir-raġel ta’ Marija ta’ Nazaret. Għadha friska l-eżortazzjoni apostolika dwar San Ġużepp “Il-Kustodju tal-Feddej” li fl-1989 tana l-Papa Ġwanni Pawlu II, li ftit xhur oħra l-Knisja ser tiddikjarah Beatu.
Continue reading >>
1 ta’ Marzu, 2011
25/2011
TALB U SOLIDARJETA’
MESSAĠĠ MILL-ISQFIJIET TA’ MALTA U GĦAWDEX
Bħala Isqfijiet ta’ Malta u Għawdex irridu ningħaqdu ma’ bosta persuni, familji u mexxejja reliġjużi u ċivili fid-dinja kollha u f’pajjiżna biex pubblikament nuru l-preokkupazzjoni tagħna għas-sitwazzjoni gravi kif żvolġiet f’xi pajjiżi Għarab.
Nifhmu li skont ir-raġuni u skont it-tagħlim soċjali tal-Knisja, ma jistax ikollok paċi u progress mingħajr ġustizzja.
Għalhekk inħeġġu lill-Insara Maltin biex inressqu t-talb tagħna lill-Mulej, Missier tajjeb ta’ kulħadd, biex jagħti l-għerf meħtieġ lil kull min hu b’xi mod responsabbli, ħalli tieqaf kull xorta ta’ vjolenza u nġustizzja biex isaltnu l-vera paċi u sliem.
Nirrikmandaw li:
• Fil-quddies kollu, sakemm is-sitwazzjoni titjieb, tiżdied invokazzjoni għal dan il-għan;
• L-Adorazzjoni Ewkaristika li ssir matul din il-ġimgħa, issir b’din l-intenzjoni;
• Bħala poplu ta’ Alla, kif dejjem għamilna, inkunu lesti noffru s-solidarjeta` konkreta kif inkunu mitluba, lil dawn ħutna fil-bżonn.
+ Pawlu Cremona O.P.
Arċisqof ta’ Malta
+ Mario Grech
Isqof ta’ Għawdex
+ Annetto Depasquale
Vigarju Ġenerali
Published on March 2, 2011
in 2011.
Nhar il-Ħadd 27 ta’ Frar, fil-Knisja Arċipretali taż-Żebbuġ, Mons. Isqof Mario Grech ta l-ministeru tal-Lettorat lil żewġ seminaristi: John Paul Cefai, mill-parroċċa tal-Qala, u Gabriel Gauci mill-parroċċa ta’ Kerċem. Bil-ministeru tal-Lettorat is-seminaristi isiru qarrejja uffiċjali tal-Kelma t’Alla waqt il-quddies u waqt ċelebrazzjonijiet liturġiċi oħra. Barra minn hekk huma jkollhom ir-responsabilità li jxandru l-Kelma t’Alla permezz tal-katekiżmu kif ukoll waqt laqgħat oħra ta’ formazzjoni Nisarnija. Dan il-ministeru jingħata lis-seminaristi li jkunu waslu fil-ħames sena tal-formazzjoni tagħhom fis-seminarju, u għalhekk dan ikun pass ieħor li jkompli jqarribhom lejn id-djakonat u s-saċerdozju. Fl-omelija tiegħu. Mons. Isqof saħaq dwar l-importanza li l-Knisja f’Għawdex ikollha nies imħejjija kif jixraq sabiex mhux biss jaqraw imma jxandru l-Kelma t’Alla, sabiex din tħalli iktar effett fuq dawk li jisimgħuha. Saħaq ukoll kemm biex min jingħażel biex jaqra waqt il-quddies ikun tassew ippreparat biex jagħmel dan.
